არჩილ გორდულაძე: „ლელოელებმა“ რა განცხადებებიც არ უნდა აკეთონ, ვერც წარსულს და ვერც აწმყოს გადაშლიან

დარწმუნებულები ვართ, საკონსტიტუციო სასამართლო მიიღებს საქართველოს კონსტიტუციით, ასევე ორგანული კანონით საკონსტიტუციო სასამართლოს შესახებ გათვალისწინებულ გადაწყვეტილებას - აიკრძალება არაკონსტიტუციური პარტიები და გაჩნდება შესაძლებლობა, რომ პოლიტიკაში ჩაერთონ არა მოღალატეები და ყველაფერზე ხელმომწერი აგენტები, არამედ ის პირები, რომელთათვისაც სამშობლოს წარმოადგენს საქართველო, - განაცხადა არჩილ გორდულაძემ „დღის ქრონიკაში“.

იურიდიულ საკითხთა საპარლამენტო კომიტეტის თავმჯდომარემ აღნიშნა, რომ „ლელო“ კოლექტიური „ნაცმოძრაობის“ შემადგენელი ნაწილია, რაც საპარლამენტო საგამოძიებო კომისიამაც დაადგინა.

„ლელო“ და ლელოელი „ნაცები“ არაფრით განსხვავდებიან კოლექტიური „ნაცმოძრაობისგან“, პირიქით, მათი შემადგენელი ნაწილები არიან. ისინი თვითგადარჩენის რეჟიმში არიან. ყველაფერს აკეთებენ, რომ როგორმე მათმა პატრონებმა ჩვენს ქვეყანაში აგენტურა გადაარჩინონ და მათი ხელით შეძლონ, რომ დაემხოს ჩვენი ქვეყნის კონსტიტუციური წყობილება, მიადგეს საფრთხე ჩვენი ქვეყნის ტერიტორიულ მთლიანობას და ზოგადად, დაზიანდეს ჩვენი ქვეყნის ინტერესები.

„ლელოელებმა“ რა განცხადებებიც არ უნდა აკეთონ, ვერც წარსულს და ვერც აწმყოს გადაშლიან. ფაქტია, რომ „ლელო“ და მისი დამფუძნებლები პირდაპირ იყვნენ და არიან დაკავშირებულები კოლექტიურ „ნაციონალურ მოძრაობასთან“, რაზეც მეტყველებს საპარლამენტო საგამოძიებო კომისიის დასკვნაც“, - განაცხადა გორდულაძემ.