„ცაჰალი“: ისრაელის თავდაცვის ძალებმა ირანის დასავლეთში მდებარე ჰაერსაწინააღმდეგო სისტემაზე მასშტაბური თავდასხმა დაასრულა

ისრაელის თავდაცვის ძალების („ცაჰალის“) ინფორმაციით, მათ ირანის დასავლეთ ნაწილში მდებარე ჰაერსაწინააღმდეგო სისტემაზე მასშტაბური თავდასხმა დაასრულეს.

„უკანასკნელ საათებში ისრაელის სამხედრო-საჰაერო ძალების გამანადგურებლებმა, დაზვერვის უწყების მიერ მოწოდებული სადაზვერვო მასალების გამოყენებით, ირანის დასავლეთში მდებარე ირანული რეჟიმის ჰაერსაწინააღმდეგო სისტემაზე მასშტაბური დარტყმები დაასრულეს“, - ნათქვამია „ცაჰალის“ მიერ გავრცელებულ განცხადებაში.

ისრაელის თავდაცვის არმიის განცხადებით, მათ გაანადგურეს ათობით ირანული რადარი და „ხმელეთი-ჰაერის“ კლასის რაკეტების გამშვები დანადგარი.

ცნობისთვის, ისრაელმა გამთენიისას ირანის წინააღმდეგ სამხედრო ოპერაცია, სახელწოდებით „აღმავალი ლომი“ დაიწყო. ოპერაციის ფარგლებში დაიბომბა ირანის ბირთვული ობიექტები, ლიკვიდირებული არიან ირანის უმაღლესი სამხედრო თანამდებობის პირები და მეცნიერ-ფიზიკოსები, რომლებიც ბირთვულ პროგრამაზე მუშაობდნენ.