პუტინი
მსოფლიო • 1781898995
G7-ის უამრავ სამიტზე ვყოფილვარ და ადრე ეს G8 იყო, მათ G8 უნდა შეენარჩუნებინათ, - განაცხადა აშშ-ის პრეზიდენტმა, დონალდ ტრამპმა გამოცემა AXIOS-თან ინტერვიუში.„სავარაუდოდ, რომ შეენარჩუნებინათ, რუსეთსა და უკრაინას შორის ომი არ იქნებოდა, მაგრამ ობამას არ უნდოდა პუტინი იქ ყოფილიყო. მგონი, კიდევ ერთ ან ორ სხვასაც არ უნდოდა. მათ პუტინის ჩამოშორება სურდათ. ადრე ეს G8 იყო. ბევრად უკეთესი იქნებოდა, ყველაფერი ისე რომ დარჩენილიყო“, - დასძინა ტრამპმა.
მსოფლიო • 1781895051
ევროკავშირი არ აპირებს, შუამავალი იყოს რუსეთ-უკრაინის მოლაპარაკებებში - ანტონიუ კოშტა
ევროპული საბჭოს პრეზიდენტის, ანტონიუ კოშტას განცხადებით, ევროკავშირი უკრაინაში ომის დასრულების შესახებ სამშვიდობო მოლაპარაკებებში შუამავლის როლის შესრულებას არ აპირებს.როგორც კოშტამ ევროკომისიის პრეზიდენტთან, ურსულა ფონ დერ ლაიენთან ერთად გამართულ პრესკონფერენციაზე აღნიშნა, ევროკავშირი ომის დასრულების შემდეგაც უკრაინის მხარეს იქნება.„ევროკავშირი არ არის და არც აპირებს, იყოს შუამავალი. ევროკავშირი უკრაინის მხარესაა. ჩვენ უკრაინის გვერდით ვიყავით ომის განმავლობაში და ომის დასრულების შემდეგაც მის გვერდით ვიქნებით“, – აღნიშნა ანტონიუ კოშტამ.ევროპული საბჭოს პრეზიდენტის განცხადებით, ნათელია, ამ ეტაპზე არ არსებობს ნიშნები, რომ რუსეთს სერიოზული მოლაპარაკებების დაწყება სურს.მისივე თქმით, „მსურველთა კოალიციას“ და მის ლიდერებს უსაფრთხოების გარანტიებთან დაკავშირებულ საკითხებში საკუთარი როლი ექნებათ. რაც შეეხება ევროკავშირის ინტერესებს, კოშტას თქმით, მათი დაცვა ბლოკის ინსტიტუტებმა ხელშეკრულებების შესაბამისად უნდა უზრუნველყონ.ამასთან, კოშტას განმარტებით, უკრაინის დიპლომატიური გზით მხარდაჭერა საჭიროა.„სწორედ იმიტომ, რომ უკრაინის მხარდაჭერა დიპლომატიური გზითაც გვჭირდება, აუცილებელია, რუსეთთან პირდაპირი დიპლომატიური არხი გვქონდეს. სამწუხაროდ, მოლაპარაკებების დაწყების დრო ჯერ არ დამდგარა“, – აღნიშნა კოშტამ.მისივე თქმით, ევროკავშირს მოლაპარაკებებში უკრაინის ჩანაცვლება არ სურს.„ჩვენ არ გვინდა უკრაინის ჩანაცვლება, რადგან მხოლოდ უკრაინას, მხოლოდ პრეზიდენტ ვოლოდიმირ ზელენსკის აქვს ლეგიტიმური უფლება, უკრაინის სახელით მოლაპარაკებები აწარმოოს“, – განაცხადა კოშტამ.თავის მხრივ, ურსულა ფონ დერ ლაიენმა აღნიშნა, რომ უკრაინა პროცესს თავად ხელმძღვანელობს.„უკრაინა პროცესს თავად ხელმძღვანელობს. ჩვენ, როგორც ევროკავშირი, უკრაინის გვერდით ვდგავართ. ადრე თუ გვიან, რუსეთს მოლაპარაკებების მაგიდასთან დაჯდომა მოუწევს, მათ შორის ჩვენი სანქციების ზეწოლის შედეგად. ეს მომენტი როდესაც დადგება, პრეზიდენტ პუტინის მიმართ ევროპას ერთიანი გზავნილი უნდა ჰქონდეს“, – განაცხადა ფონ დერ ლაიენმა.
მსოფლიო • 1781893996
პოლონეთის პრეზიდენტმა, კაროლ ნავროცკიმ მიიღო გადაწყვეტილება ვოლოდიმირ ზელენსკისთვის თეთრი არწივის ორდენის ჩამორთმევის შესახებ.თითქმის 13-წუთიან გამოსვლაში ნავროცკიმ განაცხადა, რომ „თეთრი არწივის“ ორდენი არ არის ჩვეულებრივი ჯილდო, არამედ ეს არის პოლონეთის უმაღლესი ნდობის სიმბოლო, რაც ნიშნავს განსაკუთრებულ კავშირს პოლონეთის სახელმწიფოსთან და ხალხის განსაკუთრებულ მადლიერებას.„ასეთი სიმბოლო მოითხოვს არა მხოლოდ დამსახურებებს, არამედ იმ ღირებულებების პატივისცემას, რომლებიც ჩვენი საზოგადოების საფუძველს წარმოადგენს... ამიტომ, იმის გათვალისწინებით, რომ პრეზიდენტმა ვოლოდიმირ ზელენსკიმ თანხმობა განაცხადა უკრაინის შეიარაღებული ძალების ერთ-ერთი ნაწილისთვის „უპა-ს გმირების“ სახელის მინიჭებაზე, კონსულტაციების შემდეგ, მივიღე გადაწყვეტილება უკრაინის პრეზიდენტისთვის „თეთრი არწივის“ ორდენის ჩამორთმევის შესახებ“, - განაცხადა ნავროცკიმ.მან ხაზგასმით აღნიშნა, რომ ეს გადაწყვეტილება არ არის მიმართული უკრაინელი ხალხის წინააღმდეგ და არ ნიშნავს პოლონეთის უსაფრთხოების პოლიტიკის სტრატეგიული მიმართულების ცვლილებას.„ჩვენ მხარს ვუჭერდით და ვუჭერთ მხარს უკრაინას, რადგან ვიცით, რომ რუსული აგრესია საფრთხეს უქმნის პოლონეთისა და მთელი ევროპის უსაფრთხოებას. ამ შეფასებაში არაფერი შეცვლილა. რუსეთი არის აგრესორი, ხოლო პუტინი - დამნაშავე, რომელიც პასუხისმგებელია ომის გაჩაღებაზე. ეს ომი ევროპისთვის ყველაზე დიდი შეიარაღებული კონფლიქტია მეორე მსოფლიო ომის დასრულების შემდეგ“, - განაცხადა პოლონეთის ლიდერმა.
პოლიტიკა • 1781885160
გულზე ხელი დავიდოთ და გულწრფელად უნდა ვთქვათ, რომ ცხადია საკადრო პოლიტიკა მიშას საუკეთესო მხარე არ გამოდგა, – ამის შესახებ „ნაციონალური მოძრაობის“ წევრი გია ბარამიძე სოციალურ ქსელში წერს.ბარამიძე მიხეილ სააკაშვილის დღევანდელ პოსტს აზიარებს, რომელშიც საქართველოს ყოფილი პრეზიდენტი აცხადებს, რომ „ამაზე უარეს მდგომარეობაში, როგორშიც დღესაა „ნაციონალური მოძრაობა“, უბრალოდ ვერ აღმოჩნდება“.როგორც ბარამიძე წერს, „ნაციონალური მოძრაობა“ ამანათი არაა, რომ ვინმე უცნობი, ან გამოუცდელი ადამიანი მივიდეს და ამხელა პარტია, რომელმაც ამდენ წნეხს გაუძლო, თვალდახუჭულები ენდონ.„პრეზიდენტი სააკაშვილი არის, არა მარტო ენმ-ს, არამედ, თანამედროვე ქართული სახელმწიფოს შემქმნელი, მან ობიექტურად დაიმსახურა, ჩვენი საზოგადოების ძალიან დიდი ნაწილის ნდობა და პატივისცემა.მე და ჩვენი მეგობრები, თანამებრძოლები ვამაყობთ რომ მისი ლიდერობით, ვართ ენმ წევრები, რიგითი მებრძოლები.ადამიანს არც გული, არც სინდისი და არც გონება არ უნდა გვქონდეს, რომ მის გვერდით არ დავდგეთ და მხარი არ დავუჭიროთ, მით უფრო ისეთ გარემოებებში, როცა იგი (ყოველგვარი გადაჭარბების გარეშე) პუტინის პირადი ტყვე და მოღალატე კრიმინალთა, რუსული რეჟიმის პოლიტიკური პატიმარია.მიშასადმი პირადად ჩემი თანადგომა იყო, არის და იქნება მტკიცე და ურყევი, რადგან მჯერა, რომ მას მომავალშიც შეუძლია, ჩვენი სამშობლოს გამთლიანებისა და ცივილიზებული, დემოკრატიული, ევროპული, სახელმწიფოდ ჩამოყალიბებაში დიდი წვლილი შეიტანოს. ეს არასდროს ნიშნავდა, რომ ჩვენ ტაქტიკურ, თუ საკადრო საკითხებზე განსხვავებული აზრი და კამათი არ გვქონოდა.ღმერთია მოწამე და ხალხმაც იცის, რომ სამწუხაროდ, ამ კუთხით ენმ პოლიტიკა გამართული თითქმის არასდროს იყო. აბა, გავიხსენოთ მიშას არყოფნის პირობებში, ბოლო 14 წელი ვინ იყვნენ ენმ თავმჯდომარეები და რეალურად რომ აკონტროლებდნენ პარტიას ის ხალხი და სად არიან ახლა ისინი?გულზე ხელი დავიდოთ და გულწრფელად უნდა ვთქვათ, რომ ცხადია საკადრო პოლიტიკა მიშას საუკეთესო მხარე არ გამოდგა. რაც შეეხება ნანუკას, (რომელიც ჩვენი გუნდისთვის ნამდვილად არაა უცხო) პარტიაში მოსვლას და ენმ გამოცოცხლებისა და ეფექტიანობის გასაზრდელად ლიდერის როლში ჩართვას, ნამდვილად (ალალად და გულწრფელად ვამბობ) მხოლოდ მივესალმები, თუმცა არ ვიცი, ვინ „ახალგაზრდებს” გულისხმობს, ვინც თურმე პარტიის მართვა უნდა „გადაიბარონ”?ენმ ამანათი არაა, რომ ვინმე უცნობი, ან გამოუცდელი ადამიანი (ასაკს მნიშვნელობა არ აქვს) მოვიდეს და აი ასე, აიღოს და ამხელა პარტია, რომელმაც ამდენ წნეხს გაუძლო, ამდენი მოღალატისა და გაყიდული, ან შეშინებული, და გამქრალი, ვითომ ლიდერების, „ლიდერობას” გაუძლო და დღემდე არის რეჟიმთან ბრძოლის საკვანძო ძალა, თვალდახუჭულები ვენდოთ. ახალგაზრდა ასაკი, არც გარანტია და არც თამასუქი არ არის, რომ ვინმე ვინმეს ჯობია ან მით უფრო, უფრო სანდოა, რამე საქმეში (ალბათ სპორტის გარდა) მით უფრო ასეთ სასტიკ და ვერაგ, რუსულ კრიმინალურ რეჟიმთან ბრძოლაში“, – წერს ბარამიძე.მისივე თქმით, ძალიან უცნაური და გაუგებარი იყო, როცა მოისმინეს, რომ თურმე „ნაციონალურ მოძრაობაში“ ნანუკას გუნდის ახალგაზრდები უნდა მივიდნენ და პირდაპირ პარტიის მართვა „გადაიბარონ”.„მიშას ლიდერობით, ჩვენს გუნდს ახალგაზრდა პატრიოტების მოყვანისა და ლიდერულ პოზიციებზე დაწინაურების პრობლემა რომ არ გვაქვს ამის დასტურია, იმ შესანიშნავი ახალგაზრდების პარტიის ხელმძღვანელ პოზიციებზე ყოფნა, როგორებიც არიან ლევან სანიკიძე (ენმ თავმჯდომარის მოადგილე), ირაკლი ფავლენიშვილი (ენმ გენმდივნის მოადგილე) იგორ ნარმანია (ენმ თავმჯდომარის მოადგილე), თვითონ ხაბე, ენმ პოლიტსაბჭოს თავმჯდომარე და მისი მოადგილე თათია ნიკოლაიშვილი, ენმ ანტიკორუფციული მდივანი და ლიდერები ვასო ურუშაძე, ანი წითლიძე და ბევრი სხვა., მაგრამ ყველა ამ ახალგაზრდამ პარტიის ლიდერის პოზიცია დაიკავა ნულიდან, რიგითი მებრძოლის პოზიციებზე ბრძოლით, თავდადებითა და დაიმსახურა გუნდის ნდობა. მათთვის ეს ნდობა ავანსად არავის მიუნიჭებია და არ „გადაუბარებია”. ამიტომ, ძალიან უცნაური და გაუგებარი იყო, როცა მოვისმინეთ, რომ თურმე ენმ-ში ნანუკას გუნდის ახალგაზრდები უნდა მოვიდნენ და პირდაპირ ენმ მართვა „გადაიბარონ”. ცხადია, ეს არასწორია, რადგან როცა რამეს მართავ, მით უფრო ასეთი ისტორიისა და მასშტაბის პოლიტიკურ გუნდს, იქ ჯერ იმ გუნდის წევრების ნდობა უნდა მოიპოვო და მერე იფიქრო მის მართვაზე“, – აცხადებს ბარამიძე.როგორც ბარამიძე აღნიშნავს, „ნაციონალურ მოძრაობაში“ იმის ფუფუნება აღარ აქვთ, რომ ვინმემ ამხელა ორგანიზაცია პირადი პოლიტიკური მიზნებისთვის „გამოიყენოს” და შემდეგ გაქრეს, ან გატყდეს.„ჩვენ აღარ გვაქვს იმის ფუფუნება, რომ ვინმემ ამხელა ორგანიზაცია მისი პირადი პოლიტიკური მიზნებისთვის „გამოიყენოს” (ასეთიც მოვისმინეთ) და შემდეგ გაქრეს, ან გატყდეს, ან გაიყიდოს, ან უარესი პარტიის საბოტაჟით დაკავდეს, ან პარლამენტში მიშას და ჩვენი ხალხის ნდობით შევიდნენ და მერე ხელი დაგვიქნიონ, კარგად იყავითო! სამწუხაროდ, ეს ყველაფერი უკვე გამოცდილი გვაქვს და ბუნებრივია, იმავეს გამეორება ნამდვილად აღარ გვინდა. ბოლო ბოლო ჩვენს შეცდომებზე მაინც ხომ უნდა ვისწავლოთ!ასე რომ, ახალგაზრდებს და სხვა ასაკის ახალ ხალხს, მებრძოლებს ცხადია, მივესალმებით, ოღონდ, ჯერ მათ უნდა გვაჩვენონ, რომ ენმ-ში მის გამოსაყენებლად კი არ მოდიან, არამედ გულწრფელად იზიარებენ ჩვენი გუნდის მიზნებსა და ამოცანებს და მზად არიან, გულწრფელად და არა პირადი გამორჩენის მიზნით, პარტია გამოიყენონ“, – წერს ბარამიძე.მისი თქმით, ენმ-ს გამოცოცხლებისთვის ახალი ხალხის მიყვანა საკმარისი არ არის, გამარჯვებისთვის „ნაციონალური მოძრაობა“ უნდა გახდეს „მეტად სახალხო პარტია“.„მთავარი, რაც მინდა ვთქვა, არის ის, (რასაც ერთ წელზე მეტია მიშაც ამბობს და ჩვენც) რომ ენმ-ს გამოცოცხლებისთვის ახალი ხალხის მოყვანა საკმარისი არ არის. ენმ გამარჯვებისთვის ჩვენ უნდა მეტად სახალხო პარტია გავხდეთ, რაც გულისხმობს ენმ მართვის პრინციპების ძირეულ ცვლილებას, ანუ მიშასთან და პოლიტსაბჭოსთან ერთად, პარტიის მართვის სადავეები უნდა ჰქონდეს ასევე ენმ რიგით „ნამდვილ წევრებს”, რომლებიც ენმ ინტერნეტ (შესაბამისად დაცული) აპლიკაციის მეშვეობით, უშუალოდ ჩაერთვებიან პარტიის მიერ მისაღები მთავარი პოლიტიკური გადაწყვეტილებების, მიღების პროცესში. ისეთი გადაწყვეტილებები, როგორიცაა ვთქვათ პარლამენტში შესვლა-არშესვლა, ალიანსის საკითხები (შევიდეთ ან გამოვიდეთ) ენმ ხელმძღვანელობა, პროექტები თუ საპარლამენტო არჩევნების ენმ-ს სიის სამართლიანად ფორმირების ეს ყბადაღებული საკითხი. სადაა ის ხალხი, 2012 წელს ენმ-ს საპარლამენტო სიებში რომ ეტენებოდნენ?იმ სიებს, მიშას ზურგს ამოფარებულები ხან ვინ ადგენდა (არც მინდა მაგათი სახელის ხსენება) ხან ვინ! სად არიან ახლა ისინი? სწორი იყო მაშინ ეგ სისტემა? ცხადია არა და ეს უსამართლობა უნდა დასრულდეს! ნამდვილი სახალხოობა იქნება ის, რომელზეც მიშაც საუბრობს უკვე წელზე მეტია, ნანუკამაც არაერთხელ ახსენა და რის თაობაზეც ენმ პოლიტსაბჭოსაც უკვე აქვს ნამსჯელიც და შესაბამისი რეფორმაც ( „ენმ მართვის საფუძვლიანი რეფორმა” – „მსრ”) დამტკიცებული.სწორედ ჩვენი ხალხის – „ენმ ნამდვილი წევრების” უშუალოდ ჩართულობა პარტიის გადაწყვეტილებათა პროცესში შემოიტანს რეალურ სახალხოობას და მეტ სამართლიანობასაც. როცა „ენმ ნამდვილი წევრები” ვინც თვეში საწევროს სახით, 5 ლარს შესწირავს პარტიას (და ასეთი მჯერა, არის ათობით ათასი, თუ ასობით ათასი არა) და ენმ მართული აპლიკაციის მეშვეობით, მიიღებენ მონაწილეობას შიდა კენჭისყრებში, მოგვიტანს იმას, რაც გვჭირდება ახლა, მეტ ენთუზიაზმს, პარტიისადმი ბევრად მეტ ნდობას, ბევრად მეტ სამართლიანობას და შედეგად მეტ (ძველს, მობრუნებულ და ახალ) ხალხს ენმ-ს რიგებში.ენმ „მსრ” მიღება რომ დაკანონდეს, ამისთვის უახლოეს ყრილობაზე, იგი უნდა ოფიციალურად შევიტანოთ ენმ-ს წესდებაში. ამას თუ მოვახერხებთ, ენმ მართლა შეძლება, გამოცოცხლდეს და მეტად სახალხო პარტიად (შესაბამისად, მეტად ეფექტიან) გარდაქმნას.მჯერა, ეს შესაძლებელია და ამას ნანუკაც გაიზიარებს, მაშინ ყველაფერი დალაგდება თავის ადგილზე“, – აცხადებს გია ბარამიძე.
მსოფლიო • 1781880550
რუსეთის საგარეო საქმეთა მინისტრის, სერგეი ლავროვის განცხადებით, აშშ-მა, შესაძლოა, უკრაინასთან დაკავშირებული სამშვიდობო პროცესის მიმართ თავისი მიდგომა კვლავ შეცვალოს.მისი თქმით, მოსკოვი აფასებს, რომ დონალდ ტრამპის ადმინისტრაციას თეთრ სახლში დაბრუნების შემდეგ არასდროს უარყვია დიალოგის აუცილებლობა. ამასთან, ლავროვმა აღნიშნა, რომ შეერთებულ შტატებს ღიად აქვს გამოცხადებული მიზნად რუსული კომპანიების გლობალური ენერგეტიკული ბაზრიდან განდევნა.„შეერთებული შტატები ნამდვილად უჭერს მხარს უკრაინას, არა მხოლოდ ბაიდენის ადმინისტრაციის მიერ დაწესებული სხვადასხვა სანქციის გახანგრძლივებით, არამედ საკუთარი სანქციების შემოღებითა და პენტაგონის სპეციალური პროგრამების მიღებით, რომლებიც კიევის რეჟიმის სამხედრო-სამრეწველო სექტორის მხარდაჭერას ემსახურება“, – განაცხადა ლავროვმა.მისივე თქმით, იქმნება შთაბეჭდილება, რომ ვაშინგტონის მიდგომა, შესაძლოა, კვლავ შეიცვალოს, როგორც ეს ანკორიჯში გამართული შეხვედრის შემდეგ მოხდა, როდესაც გარკვეული შეთანხმებები იქნა მიღწეული.„ახლა ყველა რაღაც „სულზე“ საუბრობს და ამბობს, რომ ეს სული გაქრა. თუმცა სულს არაფერი აქვს საერთო იმ შეთანხმებებთან. შეთანხმებები მკაფიო იყო და ისინი პრეზიდენტ პუტინისა და ამერიკული მხარის მიერ წარმოდგენილი წინადადებების საფუძველზე იქნა მიღწეული“, – აღნიშნა რუსეთის საგარეო უწყების ხელმძღვანელმა.ლავროვმა ასევე გაიხსენა მარკო რუბიოს მიერ კონგრესში გაკეთებული განცხადება, რომლის მიხედვითაც აშშ უკრაინის საკითხში შუამავლის როლს ვერ შეასრულებს, რადგან სრულად უჭერს მხარს უკრაინას.„ჩვენთვის მოულოდნელი იყო, როდესაც მარკო რუბიომ განაცხადა, რომ შეერთებული შტატები უკრაინის საკითხში შუამავალი ვერ იქნება, რადგან ის მთლიანად უკრაინის მხარეს დგას“, – განაცხადა ლავროვმა.
პოლიტიკა • 1781759587
მაკრონი: „დიდი შვიდეულის“ ყველა ქვეყანა შეთანხმდა, რომ რუსეთს მშვიდობა არ სურს
საფრანგეთის პრეზიდენტის ემანუელ მაკრონის განცხადებით, „დიდ შვიდეულში“ შემავალი ყველა ქვეყნის ლიდერი შეთანხმდა, რომ რუსეთი მშვიდობისთვის სერიოზულ მზაობას არ აჩვენებს.როგორც მაკრონმა „დიდი შვიდეულის“ სამიტის შემაჯამებელ პრესკონფერენციაზე აღნიშნა, ქვეყნის ლიდერები მივიდნენ იმ აზრამდე, რომ რუსეთის მხრიდან „მშვიდობისთვის მზაობა არ არსებობს“ მას შემდეგ, რაც მოსკოვმა აშშ-ის და ევროპის წინადადება მოლაპარაკებების დაწყების შესახებ უარყო.საფრანგეთის პრეზიდენტი აგრეთვე მიესალმა უკრაინასთან დაკავშირებით აშშ-ის მიდგომის „სიღრმისეულ ცვლილებას“. მან აღნიშნა, რომ აშშ-ის პრეზიდენტი დონალდ ტრამპი მიხვდა, რომ რუსეთის პრეზიდენტი ვლადიმერ პუტინი მშვიდობით დაინტერესებული არ არის.„პრეზიდენტმა ტრამპმა, როგორც ჩვენ ყველამ უბრალოდ აღიარა, რომ დღეს რუსეთის მხრიდან მშვიდობის საკითხების განხილვისთვის მზაობა არ არსებობს“, - თქვა მაკრონმა.
მსოფლიო • 1781718836
„დიდი შვიდეულის“ ყველა ლიდერი შეთანხმდა მოსაზრებაზე, რომ რუსეთს მშვიდობა არ სურს - ემანუელ მაკრონი
„დიდი შვიდეულის“ ყველა ლიდერი შეთანხმდა მოსაზრებაზე, რომ რუსეთს მშვიდობა არ სურს, – ამის შესახებ „დიდი შვიდეულის“ სამიტის შემდეგ გამართულ პრესკონფერენციაზე საფრანგეთის პრეზიდენტმა, ემანუელ მაკრონმა განაცხადა.მისივე თქმით, მოსკოვმა უარყო აშშ-ისა და ევროპის მიერ შეთავაზებული მოლაპარაკებების დაწყების წინადადებები, რაც, მისი თქმით, მიუთითებს იმაზე, რომ რუსეთის მხრიდან მშვიდობის მიღწევის „ნამდვილი სურვილი“ არ ჩანს.„პრეზიდენტმა ტრამპმა, ისევე როგორც ყველა ჩვენგანმა, უბრალოდ აღიარა, რომ ამ ეტაპზე რუსეთის მხრიდან მშვიდობის საკითხებზე საუბრისთვის რეალური მზადყოფნა არ არსებობს“, – განაცხადა მაკრონმა.ამასთან, საფრანგეთის პრეზიდენტმა აღნიშნა, რომ აშშ-ის მიდგომა უკრაინის საკითხის მიმართ მნიშვნელოვნად შეიცვალა. მისი თქმით, აშშ-ის პრეზიდენტმა გააცნობიერა, რომ რუსეთის პრეზიდენტი, ვლადიმერ პუტინი ამ ეტაპზე მშვიდობის მიღწევით დაინტერესებული არ არის.
მსოფლიო • 1781708280
ევროკავშირმა კრემლთან კონტაქტის დამყარება დაიწყო იმ ფონზე, როდესაც ახალი იმპულსი ეძლევა რუსეთთან სამშვიდობო მოლაპარაკებების გამართვას, რაც უკრაინაში მიმდინარე ომის დასრულებას ისახავს მიზნად. ინფორმაციას ამის შესახებ გამოცემა EURACTIV-ი ავრცელებს.ევროპული საბჭოს პრეზიდენტის, ანტონიუ კოშტას დაქვემდებარებაში მყოფმა ოფიციალურმა პირებმა აქტიური ნაბიჯები გადადგეს კავშირების დასამყარებლად, რაც მიზნად ისახავს რუსეთის პრეზიდენტის, ვლადიმირ პუტინის ჩართვას სამშვიდობო მოლაპარაკებების პროცესში.„ბოლო რამდენიმე კვირის განმავლობაში კომუნიკაციის არხების გასახსნელად ხანმოკლე კონტაქტები შედგა, თუმცა არსებით საკითხებზე მსჯელობა არ ყოფილა“, - განაცხადა ევროკავშირის ერთ-ერთმა ოფიციალურმა პირმა.კრემლთან კავშირის დამყარების მცდელობა, რომლის შესახებაც პირველად სააგენტო Bloomberg-მა განაცხადა, მოჰყვა დონალდ ტრამპის პოზიციის შეცვლას „დიდი შვიდეულის“ სამიტზე, რაც პუტინზე ზეწოლასა და ევროპელებისთვის უფრო დიდი როლის მინიჭებას გულისხმობს.
მსოფლიო • 1781634085
The Telegraph: ევროპა ნელ-ნელა აცნობიერებს კაია კალასის აბსურდულობას
ევროკავშირს 2010 წლიდან აქვს დინამიური სახელწოდების მქონე საგარეო ქმედებათა სამსახური (EEAS) - ბოლო 18 თვეა, ესტონეთის ყოფილ პრემიერ-მინისტრს, კაია კალასს უკავია ევროკავშირის უმაღლესი წარმომადგენლის მნიშვნელოვნად ჟღერადი თანამდებობა საგარეო საქმეთა და უსაფრთხოების პოლიტიკის საკითხებში, რასაც იგი საგარეო საქმეთა საბჭოს თავმჯდომარისა და ევროკომისიის ვიცე-პრეზიდენტის მოვალეობებსაც უთავსებს, - წერს ბრიტანული გამოცემა The Telegraph სტატიაში სათაურით „ევროპა ნელ-ნელა აცნობიერებს კაია კალასის აბსურდულობას“.„მაგრამ რას აკეთებს კალასი სინამდვილეში? ის არც კი მიუწვევიათ, როდესაც ევროპელი ლიდერები ერთმანეთს დაუკავშირდნენ, რათა დონალდ ტრამპის ვლადიმირ პუტინთან გამართული სამიტი განეხილათ, რომელიც გასულ აგვისტოს ალასკაში შედგა [ევროკავშირს მის ნაცვლად ევროკომისიის პრეზიდენტი, ურსულა ფონ დერ ლაიენი წარმოადგენდა]. მართლაც, როდესაც კი იმ მსოფლიო ლიდერებიდან რომელიმეს უმაღლესი რანგის ევროპელებთან გასაუბრება სურს, ისინი კალასს კი არ ურეკავენ, არამედ ემანუელ მაკრონს, ფრიდრიხ მერცს ან ჯორჯია მელონის“, - წერს სტატიის ავტორი ოუენ მეთიუსი.სტატიის ავტორის თქმით, კალასის ოფიციალური მოვალეობა ევროკავშირის საგარეო პოლიტიკის კოორდინაცია და მისი მკაფიოდ ჩამოყალიბებაა. „თუმცა მისი - და მთელი ევროპის - პრობლემა ის არის, რომ მსგავსი თანმიმდევრული, მით უმეტეს ერთიანი, საგარეო პოლიტიკა უბრალოდ არ არსებობს“.„ავიღოთ, მაგალითად, ევროკავშირის მიერ რუსეთისთვის დაწესებული სანქციების 20 პაკეტი, რაც საგარეო ქმედებათა ევროპული სამსახურის დიდ ტრიუმფადაა გასაღებული. თეორიულად, ყველა წევრი ქვეყანა მხარს უჭერს ვლადიმირ პუტინის დასჯას უკრაინაში შეჭრის გამო. პრაქტიკაში კი, ირლანდია კვლავ აგრძელებს იმ ფოლადის წარმოებას, რომელიც, სავარაუდოდ, რუსულ სამხედრო მანქანას კვებავს, ხოლო რუსული „ლუკოილი“ კვლავ ამუშავებს ნავთობგადასამუშავებელ ქარხნებს ნიდერლანდებში, ბულგარეთსა და რუმინეთში [თუმცა ახლა მათი გაყიდვის პროცესშია, რაც, ირონიულია, მაგრამ არა ევროკავშირის სანქციების, არამედ აშშ-ის ზეწოლის შედეგია]. ევროპული ტანკერები კვლავ აგრძელებენ რუსული ნავთობის ტრანსპორტირებას, ხოლო ევროკავშირი, მთლიანობაში, რუსეთის მიერ მსოფლიო მასშტაბით ექსპორტირებული თხევადი ბუნებრივი აირის გამაოგნებელ 49 პროცენტს ყიდულობს. მიუხედავად იმისა, რომ მილსადენით რუსული ნავთობის მიწოდებაზე ფორმალური აკრძალვა არსებობს, უნგრეთი და სლოვაკეთი არა მხოლოდ აგრძელებენ „გაზპრომის“ ნავთობის იმპორტს „დრუჟბის“ მილსადენით, არამედ, რაც კიდევ უფრო გასაკვირია, აიძულეს ევროკავშირი, გადაეხადა მისი შეკეთების საფასური, როდესაც იანვარში მილსადენის უკრაინული მონაკვეთი ააფეთქეს“, - აღნიშნულია სტატიაში.სტატიის ავტორი ხაზგასმით აღნიშნავს, რომ „კალასმა არაერთხელ ვერ შეძლო დაერწმუნებინა ევროპული ქვეყნები, რომ მისი სიტყვები საქმედ ექციათ. გასულ წელს იგი შეეცადა უკრაინისთვის 40 მილიარდი ევროს ოდენობის სამხედრო დახმარება მოეზიდა, თუმცა საფრანგეთის, იტალიისა და ესპანეთის წინააღმდეგობამ აიძულა იგი, ეს თანხა საბრძოლო მასალისთვის განკუთვნილ „რეალისტურ“ 5 მილიარდ ევრომდე შეემცირებინა“.„გასაკვირი არ არის, საგარეო ქმედებათა ევროპული სამსახურის (EEAS) ფუნდამენტური სტრუქტურული უძლურების გათვალისწინებით, რომ ფრანგმა მაღალჩინოსნებმა უკვე დაიწყეს რეფორმების მთელი პაკეტის განხილვა. ფრანგების წინადადებაა, სამსახურის 140 საერთაშორისო წარმომადგენლობა მხოლოდ 18 რეგიონულ ჰაბად გაერთიანდეს. რაც კიდევ უფრო მნიშვნელოვანია, სანქციების სიების შედგენა და სამხედრო მისიების დაგეგმვა ევროპულ საბჭოს გადაეცემა, ხოლო ყოველდღიურ დიპლომატიას ზედამხედველობას ევროკომისია გაუწევს. მოკლედ რომ ვთქვათ, კალასი დამოუკიდებელი სამსახურის მართვის ნაცვლად, ანგარიშვალდებული იქნება ევროკავშირის წევრი ქვეყნების წინაშე. [...] იდეა იმის შესახებ, რომ ევროპა ერთიანი ხმით საუბრობს, ყოველთვის ილუზია იყო. მალე კი ეს ოფიციალურადაც გაფორმდება“, - დასძინა სტატიის ავტორმა.
მსოფლიო • 1781633231
მედია - რუსეთში ვიზიტის გამო რამდენიმე ევროდეპუტატს შესაძლოა, სანქციები დაუწესდეს
ევროპარლამენტში რუსეთში ვიზიტის გამო რამდენიმე ევროდეპუტატის სანქცირების საკითხს განიხილავენ.ევროპარლამენტის რამდენიმე წევრს, მათ შორის რუმინელ ევროდეპუტატ დიანა შოშოაკეს, შესაძლოა, სანქციები დაეკისროს სანქტ-პეტერბურგის საერთაშორისო ეკონომიკურ ფორუმში მონაწილეობის გამო, რომელშიც რუსეთის პრეზიდენტი ვლადიმერ პუტინიც მონაწილეობდა.მედიის ინფორმაციით, ევროპარლამენტის პრეზიდენტმა, რობერტა მეცოლამ დისციპლინურ კომიტეტს მიმართა, რათა შეისწავლოს ლუქსემბურგელი ევროდეპუტატის ფერნან კარტაიზერის ქმედებები და დაადგინოს, შეესაბამებოდა თუ არა მისი, ასევე სხვა მონაწილე ევროდეპუტატების მოქმედებები ევროპარლამენტის წესებს.როგორც მედია წერს, მეცოლას ყურადღება განსაკუთრებით მიიპყრო დოკუმენტმა, რომელიც კარტაიზერმა სანქტ-პეტერბურგში წარადგინა და რომელიც, მისი თქმით, ევროპარლამენტარების სახელით იყო მომზადებული, თუმცა მას ხელმოწერები არ ერთვოდა. დოკუმენტი ევროკავშირსა და რუსეთს შორის ურთიერთობების აღდგენის პერსპექტივებს ეხებოდა, თუმცა მასში რუსეთის მიერ უკრაინის წინააღმდეგ მიმდინარე ომი არ იყო ნახსენები.ევროპარლამენტის პრეზიდენტის შეფასებით, აღნიშნულმა დოკუმენტმა შესაძლოა, შექმნას შთაბეჭდილება, რომ ევროპარლამენტსა და რუსეთის დუმას შორის არაოფიციალური საკომუნიკაციო არხი არსებობს.მეცოლამ ასევე აღნიშნა, რომ კარტაიზერს სრულად არ ჰქონდა დეკლარირებული მესამე ქვეყნების ოფიციალურ წარმომადგენლებთან შეხვედრები. ევროპარლამენტის წესების მიხედვით, დეპუტატები ვალდებულნი არიან, აცნობონ ინსტიტუციას იმ ღონისძიებებში მონაწილეობის შესახებ, რომელთა ხარჯებს მესამე მხარე ფარავს. დისციპლინური კომიტეტი თუ დაადგენს, რომ კარტაიზერმა ქცევის კოდექსი დაარღვია, მას შეიძლება, დაეკისროს ფინანსური ჯარიმა ან აეკრძალოს ევროპარლამენტის წარმომადგენლობა საერთაშორისო ვიზიტების დროს.თავად, კარტაიზერმა განაცხადა, რომ საქმის შესახებ მედიიდან შეიტყო და აღნიშნა, რომ არაფერი აქვს დასამალი და თავისი საქმიანობით ამაყობს.ამასთან, რუმინული მედიის ცნობით, ანალოგიური გამოძიება შესაძლოა, დიანა შოშოაკეს წინააღმდეგაც დაიწყოს. შოშოაკემ განაცხადა, რომ მის წინააღმდეგ გამოძიების დაწყების საფუძველს ვერ ხედავს, რადგან რუსეთში საკუთარი სახსრებით იმყოფებოდა.„რუსეთი აკრძალული ქვეყანა არ არის და ვერავინ აგვიკრძალავს იქ ან საერთაშორისო ფორუმებზე გამგზავრებას. ვიდრე ევროპულ სახსრებს არ ვიყენებ და ვიზიტს რუსეთი არ აფინანსებს, გამოძიების საფუძველი არ არსებობს“, – განაცხადა შოშოაკემ.
მსოფლიო • 1781553823
ვოლოდიმირ ზელენსკიმ და დონალდ ტრამპმა განიხილეს აშშ-ში ვლადიმირ პუტინთან შეხვედრის ორგანიზების შესაძლებლობა. ამის შესახებ უკრაინის პრეზიდენტმა განაცხადა.„გუშინ პრეზიდენტ ტრამპთან განვიხილეთ, რომ ასეთი შეხვედრა შეიძლება მოეწყოს აშშ-ში - ისეთი ფორმატით, სადაც პუტინისთვის ბევრად უფრო რთული იქნება უარის თქმა, სულ მცირე, პრეზიდენტ ტრამპისთვის მაინც. ვნახოთ, რა გამოვა აქედან. თუ რუსეთი ამ შანსზეც უარს იტყვის, დამატებითი ზეწოლა იქნება საჭირო“, - აღნიშნა უკრაინის პრეზიდენტმა.ზელენსკიმ გაიხსენა, რომ პუტინს მანამდეც სთავაზობდნენ შეხვედრებს ნებისმიერ ადგილას, სადაც სრულმასშტაბური ომის დასრულების შესახებ რეალური გადაწყვეტილებების მიღება იქნებოდა შესაძლებელი, თუმცა რუსეთის ლიდერი ამით არ დაინტერესებულა.„ჩვენ აშშ-სა და საფრანგეთთან განვიხილეთ რუსეთთან შეხვედრის შესაძლებლობა „დიდი შვიდეულის“ ფარგლებში, სადაც ყველა დემოკრატიული ქვეყანა იქნებოდა წარმოდგენილი. პუტინს ეს არ სურს“, - დასძინა მან.
მსოფლიო • 1781542444
ტრამპი აცხადებს, რომ ზელენსკი და პუტინი მზად არიან, „გააკეთონ რაღაც“ უკრაინაში ომის დასასრულებლად
აშშ-ის პრეზიდენტმა, დონალდ ტრამპმა განაცხადა, რომ უკრაინის პრეზიდენტი ვოლოდიმირ ზელენსკი და რუსეთის პრეზიდენტი ვლადიმერ პუტინი მზად არიან, „რაღაც გააკეთონ“ უკრაინაში ომის დასასრულებლად. ამის შესახებ ტრამპმა ევიანში, დიდი შვიდეულის სამიტის წინ საფრანგეთის პრეზიდენტ ემანუელ მაკრონთან შეხვედრისას განაცხადა.აშშ-ის პრეზიდენტის თქმით, კვირას მას „კარგი“ სატელეფონო საუბრები ჰქონდა, როგორც ზელენსკისთან, ისე პუტინთან.„გუშინ ძალიან კარგი საუბარი მქონდა პრეზიდენტ ზელენსკისთან და პრეზიდენტ პუტინთან. ვხედავ, რომ შესაძლოა, შევძლოთ ამ მიმართულებით რაღაცის გაკეთება. ნამდვილად ასე ვფიქრობ. ვფიქრობ, ორივე მხარე ამისთვის მზად არის“, – განაცხადა ტრამპმა.ტრამპმა ასევე აღნიშნა, რომ ის ყურადღებას გაამახვილებს უკრაინაში ომის შეწყვეტაზე და შეეცდება, გაარკვიოს, „შეძლებენ თუ არა ამის მიღწევას“.„ამ საკითხზე ვიმუშავებთ და ვნახავთ, შევძლებთ თუ არა ამის გაკეთებას. ყოველთვიურად იღუპება 25 ათასი ადამიანი, ძირითადად სამხედროები და ეს არ უნდა ხდებოდეს. გუშინ ორი ძალიან კარგი საუბარი მქონდა. ამაზე კიდევ ვისაუბრებთ“, — განაცხადა ტრამპმა.
