ოპოზიციის შეხვედრაზე ჩამოვყალიბდით ძირითად პოლიტიკურ გზავნილებზე, რომლებიც სალომე ზურაბიშვილმა უნდა გააჟღეროს ამერიკის შეერთებულ შტატებში - ლევან ბეჟაშვილი

ჩამოვყალიბდით ძირითად პოლიტიკურ გზავნილებზე, რომლებიც სალომე ზურაბიშვილმა უნდა გააჟღეროს ამერიკის შეერთებულ შტატებში, – ამის შესახებ „ერთიანობა – ნაციონალური მოძრაობის“ ლიდერმა, ლევან ბეჟაშვილმა ბარიერგადალახული ოპოზიციური პარტიების შეხვედრის შემდეგ ჟურნალისტებს განუცხადა.

მისივე თქმით, შეხვედრაზე ასევე განიხილეს არჩევნებთან დაკავშირებული საკითხები. როგორც ბეჟაშვილმა აღნიშნა, ამ მხრივ მუშაობა კვლავ გაგრძელდება.

„საზოგადოებისთვის ცნობილია, რომ სალომე ზურაბიშვილი მიემგზავრება ამერიკის შეერთებულ შტატებში, დაესწრება ინაუგურაციის პროცესს. ეს უკვე ცალკე გამოკვეთილი, მნიშვნელოვანი პოლიტიკური აქტია, სადაც კიდევ ერთხელ ნათლად ჩანს, რომ საერთაშორისო პარტნიორები არ აღიარებენ ივანიშვილის რეჟიმის არჩევნებსა და იქიდან დაკომპლექტებულ მთავრობას, ისინი დგანან ქართველი ხალხის გვერდით. იმავდროულად, მნიშვნელოვანია, რა პოლიტიკურ გზავნილებს ჩაიტანს სალომე ზურაბიშვილი. დღევანდელი შეხვედრა ამით იყო მნიშვნელოვანი, რომ პოლიტიკური პარტიები, არასამთავრობო ორგანიზაციები ჩამოყალიბდნენ ძირითად საკითხებზე, რომლებიც უნდა გაჟღერდეს პარტნიორებთან მოლაპარაკებების დროს. იმავდროულად, საარჩევნო საკითხებთან დაკავშირებით მზაობა უნდა ჰქონდეს პოლიტიკურ სპექტრს და სამოქალაქო საზოგადოებას. ამ საკითხებზე გაგრძელდება მუშაობა. რა თქმა უნდა, შეთანხმება ყველა საკითხზე ისედაც არის, საუბარია დეტალური გეგმის გაწერაზე, რომელიც ასევე მნიშვნელოვანი, საინტერესო იქნება დასავლელი პარტნიორებისათვის, მაგრამ ამ ეტაპზე ჩამოვყალიბდით ძირითად გზავნილებზე, რომლებიც პოლიტიკური გზავნილის სახით სალომე ზურაბიშვილმა უნდა გააჟღეროს ამერიკის შეერთებულ შტატებში“, – განაცხადა ლევან ბეჟაშვილმა.