ოპოზიცია აბნეულია, ისინი გარედან მიღებულ ინსტრუქციებს მიჰყვებიან, არა ქართველ ხალხს, არამედ სხვა ხალხებს ელაპარაკებიან - შალვა პაპუაშვილი

ზოგადად, ოპოზიცია აბნეულია. აქედან გამომდინარე, მათი რაიმე ქცევის, გადაწყვეტილების თუ სიტყვის ანალიზს აზრი არ აქვს, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს კითხვის საპასუხოდ განუცხადა.

პაპუაშვილს ოპოზიციის ზოგიერთი წარმომადგენლის მხრიდან სალომე ზურაბიშვილის მიმართ კრიტიკაზე დაუსვეს კითხვა.

„ერთადერთი, რაზეც ისინი მიყვებიან, გარედან მიღებული ინსტრუქციებია. ამიტომ, დადიან არა ქართველ ხალხთან და ელაპარაკებიან არა ქართველ ხალხს, არამედ სხვა ნებისმიერ ქვეყანას, სხვა ხალხებს, რადგან მათი ინტერესების გამტარებლები არიან“, – განაცხადა შალვა პაპუაშვილმა.