„ნაციონალური მოძრაობის“ ინფორმაციით, თინა ბოკუჩავა მაია სანდუს შეხვდა

„ნაციონალური მოძრაობის“ თავმჯდომარე თინა ბოკუჩავა და პარტიის პოლიტიკური მდივანი გიორგი ბარამიძე მოლდოვის პრეზიდენტს, მაია სანდურს, ვიცე-პრემიერსა და საგარეო საქმეთა მინისტრს, მიჰაი პოპსოის შეხვდნენ. ინფორმაციას პარტიის პრესსამსახური ავრცელებს.

როგორც ბოკუჩავამ შეხვედრის შემდეგ განაცხადა, მოლდოვის დამოუკიდებლობის დღის აღსანიშნად კიშინეუში „ვაიმარის სამკუთხედის“ ლიდერების სტუმრობა ადასტურებს, რომ ევროკავშირი მოლდოვის ევროკავშირში გაწევრიანებაში ძალისხმევას დებს.

მისივე თქმით, ევროპაში ქართველ ხალხსაც ელოდებიან და მნიშვნელოვანია საგარეო ფრონტზე ძალისხმევის გაორმაგება, რათა საქართველო საერთაშორისო დღის წესრიგიდან არ მოიხსნას.

„ჩვენ დღეს შევხვდით როგორც მოლდოვის პრეზიდენტს, მაია სანდუს, ასევე საგარეო საქმეთა მინისტრს გუშინდელი ისტორიული მოვლენის შემდეგ, როდესაც მოლდოვის დამოუკიდებლობის დღის აღსანიშნავად და მისი ევროინტეგრაციის მხარდასაჭერად აქ, კიშინეუში იმყოფებიან „ვაიმარის სამკუთხედის“ სამივე ლიდერი – ემანუელ  მაკრონი, დონლად ტუსკი და ფრიდრიხ მერცი, რაც ადასტურებს, რომ ევროკავშირი ყველანაირ ძალისხმევას დებს მოლდოვის ევროკავშირში გაწევრიანებაში, რაც არის მთავარი გარანტი მშვიდობის, თავისუფლებისა და ევროპული კეთილდღეობის ევროპულ სივრცეში. ჩვენ დღეს ამ შესაძლებლობას გვართმევს ივანიშვილის კრიმინალური ბანდა, მაშინ როდესაც ევროპაში ჩვენც, ქართველ ხალხსაც გველოდებიან. ეს შესაძლებლობა ხელისგულზე დევს, ამიტომაც აუცილებელია, გავაორმაგოთ ძალისხმევა საგარეო ფრონტზე, რათა საქართველო არ მოიხსნას საერთაშორისო დღის წესრიგიდან, ასევე ქვეყნის შიგნით და ამ პროცესების სინქრონიზაციით მოვიტანოთ რეჟიმის ცვლილება და დავაბრუნოთ საქართველო ევროინტეგრაციის გზაზე“, – განაცხადა თინა ბოკუჩავამ.