მამუკა მდინარაძე: ვართ ძალიან მნიშვნელოვანი, მათ შორის სტრატეგიული გეოპოლიტიკური მნიშვნელობის ქვეყანა. როგორც კი ამას გავიაზრებთ, მივხვდებით, რომ სახვეწარი არავისთან არაფერი გვაქვს. უნდა ვიცოდეთ ჩვენი ფასი, ჩვენი პოლიტიკური ფასი

ჩვენი გეოპოლიტიკური მდებარეობა და მნიშვნელობა უნდა გვქონდეს ყველას გააზრებული. პოლიტიკოსები, რომლებიც იღებენ თავისი სამშობლოს, თავისი ქვეყნის შესახებ გადაწყვეტილებებს, პირველ რიგში მათ უნდა ჰქონდეთ გააზრებული სად ვცხოვრობთ, - განაცხადა საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა მამუკა მდინარაძემ, გადაცემაში „იმედი Live“ საგარეო პოლიტიკური ურთიერთობების დალაგების გზებზე საუბრისას.

მისი თქმით, საქართველოს არავისთვის აქვს სახვეწარი ქვეყნის გეოგრაფიული მდებარეობიდან გამომდინარე.

„საქართველოსთვის არ არის გეოგრაფია შემაფერხებელი. ერთი მხრივ, ის ევროპის ნაწილია. მეორე მხრივ, ჩვენ ჩვენს მეგობარ, მეზობელ, პარტნიორ ქვეყნებს, კარგად ვიცნობთ - აზერბაიჯანი და სომხეთი, მათი გეოგრაფიული მდებარეობა, მათ შორის პოლიტიკური. ჩვენ კიდევ უფრო მნიშვნელოვანი მდებარეობა გვაქვს. ნუ წარმოვიდგენთ ისე, რომ ვიღაც გვჭირდება ძალიან, ეს ვიღაცა, რაც არ უნდა პატივსაცემი ორგანიზაცია, პირთა ჯგუფი თუ სახელმწიფოთა გაერთიანება იყოს. ჩვენც უნდა ვიცოდეთ და გადაწყვეტილებებიც როგორ მივიღოთ, გაგვიადვილდება, რომ ვართ ძალიან მნიშვნელოვანი, მათ შორის სტრატეგიული გეოპოლიტიკური მნიშვნელობის ქვეყანა. როგორც კი ამას გავიაზრებთ, მივხვდებით, რომ ჩვენ სახვეწარი არავისთან არაფერი გვჭირს. თუკი გეოპოლიტიკაზე ვლაპარაკობთ, უნდა ვიცოდეთ ჩვენი ფასი, ჩვენი პოლიტიკური ფასი“, - განაცხადა მამუკა მდინარაძემ.

მისივე თქმით, საგარეო პოლიტიკური ურთიერთობების დასარეგულირებლად, გეოგრაფიული მდებარეობის გარდა მნიშვნელოვანია ის რეფორმები და ნაბიჯები, რომელსაც ხელისუფლება დგამს.

უმრავლესობის ლიდერის განმარტებით, აგენტურის ეს რიტორიკა, რომ ყველაფერს რუსული ეძახო, ქართველ ერში არ ჭრის, რადგან ქართველი ხალხი თავისა იდენტობისა და ტრადიციების ერთგულია.