Bloomberg: ევროპისა და კანადის ლიდერები პარიზში მომავალ კვირას უკრაინის საკითხის განსახილველად შეიკრიბებიან

საფრანგეთის დედაქალაქ პარიზში მომავალ კვირას ევროპული ქვეყნებისა და კანადის ლიდერების მონაწილეობით მორიგი სამიტი გაიმართება, სადაც უკრაინის საკითხზე იმსჯელებენ. ინფორმაციას Bloomberg-ი ავრცელებს.

სააგენტოს ცნობით, ევროკავშირის ქვეყნებიდან სამიტზე საფრანგეთის გარდა იქნებიან გერმანია, იტალია და პოლონეთი. მოსალოდნელია, რომ ღონისძიებას დიდი ბრიტანეთის პრემიერ-მინისტრი, კირ სტარმერიც შეუერთდეს.

როგორც Bloomberg-ი იუწყება, კიევის ევროპელ მოკავშირეებს სამშვიდობო პროცესთან შეერთება სურთ მას შემდეგ, რაც აშშ-მა და რუსეთმა უკრაინაში კონფლიქტის დასრულებაზე საუბარი დაიწყეს.