თურქეთში, ქორწილში სიძეს პატარძლის ნათესავმა ესროლა და მოკლა - ქალი უკვე დაკავებულია

თურქეთში ქორწილი ტრაგედიად იქცა. საქმროს პატარძლის ნათესავის პისტოლეტიდან ესროლეს. 23 წლის ალი კარაჯა ქორწილის დღეს, სადღესასწაულო სროლების დროს სასიკვდილოდ დაიჭრა. 

ახალგაზრდა წყვილი - ალი კარაჯა და მისი რჩეული ბეიზანურ ბეიაზიტი - საზეიმო ცერემონიის შემდეგ სახლში ბრუნდებოდნენ. ამ მომენტში გაისმა გასროლა, რაც ზოგიერთ რეგიონში დღემდე ტრადიციად ითვლება. თუმცა, ერთ-ერთი გასროლა სასიკვდილო აღმოჩნდა - ტყვია საქმროს მოხვდა. 

მძიმედ დაჭრილი ალი საავადმყოფოში გადაიყვანეს. ექიმები მისი სიცოცხლისთვის იბრძოდნენ, მაგრამ ჭრილობები ძალიან მძიმე იყო. რამდენიმე საათის შემდეგ სასიძო გარდაიცვალა.

თურქული მედიის ცნობით, იარაღი პატარძლის 47 წლის ნათესავმა ქალმა ისროლა. ქალი ადგილზე დააკავეს. მოგვიანებით, სამართალდამცველებმა მის სახლში ორი არარეგისტრირებული პისტოლეტი აღმოაჩინეს.

თურქეთის პროკურატურამ დაუყოვნებლივ დაიწყო გამოძიება.

ინციდენტმა საზოგადოების დიდი აღშფოთება გამოიწვია. სოციალური მედიის მომხმარებლები ტრაგედიას განიხილავენ და მას „ბარბაროსობას“ უწოდებენ. ბევრი ასეთი ქმედებებისთვის უფრო მკაცრ სასჯელს მოითხოვს.

როგორც თურქი ჟურნალისტები აღნიშნავენ, სადღესასწაულო სროლები კვლავ მწვავე პრობლემად რჩება, განსაკუთრებით ქვეყნის ჩრდილოეთ და ცენტრალურ რეგიონებში. 

ქორწილებში სროლა ძველ ჩვეულებად ითვლება, განსაკუთრებით შავი ზღვის რეგიონებში. ყოველწლიურად ასეთი გართობა სიკვდილს და დაშავებას იწვევს. 

პროკურატურა აგრძელებს ალი კარაჯას გარდაცვალების გარემოებების გამოძიებას.