მაკრონი: უკრაინაში ჯარების გაგზავნა ამ ეტაპზე დაძაბულობის ესკალაციას გამოიწვევს

საფრანგეთის პრეზიდენტმა, ემანუელ მაკრონმა კიდევ ერთხელ განმარტა თავისი პოზიცია უკრაინაში დასავლური ჯარების შესაძლო გაგზავნასთან დაკავშირებით. კითხვაზე, თუ რატომ არ არის ის მზად ამ ნაბიჯისთვის სამშვიდობო შეთანხმების მიღწევამდე, მაკრონმა ვრცელი და არგუმენტირებული პასუხი გასცა.

მაკრონის თქმით, ამჟამად არ არსებობს იმის მტკიცებულება, რომ რუსეთი სამშვიდობო შეთანხმებისთვის სერიოზულადაა განწყობილი. მოსკოვი აგრძელებს სამოქალაქო პირების დაბომბვას, აჭიანურებს მოლაპარაკებებს და უკრაინისგან დათმობების მოპოვებას ცდილობს.

საფრანგეთის ლიდერი მიიჩნევს, რომ ახლა ჯარების გაგზავნა შეცდომა იქნება, რადგან ევროპას დაძაბულობის ესკალაციაში დაადანაშაულებენ, რაც მდგომარეობას კიდევ უფრო გააუარესებს. გარდა ამისა, ამ საკითხზე ევროპული პასუხი, სავარაუდოდ, დანაწევრებული იქნება.

მაკრონის აზრით, ამჟამინდელი ფოკუსი უნდა მიიმართოს შემდეგი მიმართულებებით: აშშ-თან ხელახალი ჩართულობა და იმ რეალობის აღიარება, რომ მოკლევადიან პერსპექტივაში სანდო მოლაპარაკებების სივრცე არ არსებობს. გარდა ამისა, დამატებითი სანქციები უნდა დაწესდეს რუსეთზე და აქტიური ქმედებები განხორციელდეს რუსეთის „ჩრდილოვანი ფლოტის“ წინააღმდეგ.

„მე მშვენივრად მესმის და პატივს ვცემ იმ ფაქტს, რომ ეს ხედვა თქვენთვის იდეალური არ არის, მაგრამ მიმაჩნია, რომ ის სარწმუნოა და მოკლევადიან პერსპექტივაში საუკეთესო შესაძლო სცენარს წარმოადგენს“, - განაცხადა მაკრონმა.