გაერო-ში აცხადებენ, რომ ღაზაში ისრაელის ქმედებები აკმაყოფილებს გენოციდის განმარტებისთვის დადგენილ კრიტერიუმებს

ისრაელის ქმედებები ღაზაში გენოციდს უტოლდება, – ამის შესახებ გაერთიანებული ერების ორგანიზაციის მიერ შექმნილი კომისია იუწყება.

გაერო-ს ანგარიშში ნათქვამია, რომ ღაზაში „პალესტინელების განადგურება ხდება“ და ისრაელის ქმედებები აკმაყოფილებს გენოციდის განმარტებისთვის დადგენილ კრიტერიუმებს.

როგორც „სქაი ნიუსის“ წერს, ეს პირველი შემთხვევაა, როდესაც გაერო-მ მსგავსი განცხადება საჯაროდ გააკეთა და, სავარაუდოდ, მას ისრაელის მთავრობის კრიტიკა მოჰყვება.

მედიის ცნობით, ისრაელი გაერო-ს კომისიასთან თანამშრომლობაზე უარს აცხადებს და აღნიშნავს, რომ კომისია მიკერძოებულია.

ისრაელი ამ დროისთვის ღაზის დაახლოებით 75%-ს აკონტროლებს. ისრაელის თავდაცვის ძალების მონაცემებით, ბოლო დღეების განმავლობაში ქალაქი ღაზა ღამით 20 000-მა პალესტინელმა დატოვა.

გავრცელებული ცნობით, ქალაქიდან 320 000-ზე მეტი პალესტინელი გადავიდა სექტორის სხვა რაიონებში, რაც ისრაელის არმიის მიერ ამ ტერიტორიაზე „ჰამასის“ წინააღმდეგ დაგეგმილი შეტევის დაწყებამდე მოხდა.