აღმოჩენილია ერთ-ერთი უდიდესი ოქროს საბადო

გეოლოგებმა დედამიწის სიღრმეში ერთ-ერთი უდიდესი ოქროს საბადო აღმოაჩინეს. საბადო ცენტრალურ ჩინეთშია და როგორც ადგილობრივი მედია წერს, მსგავსი მასშტაბის აღმოჩენა უახლეს ისტორიას არ ახსოვს.

ადგილობრივი მედიის ინფორმაციით, ჰუნანის პროვინციის პინგძიანგის ოლქში მდებარე ეს ადგილი შეიცავს 1000 მეტრულ ტონაზე მეტ ოქროს - რაც დაახლოებით 78 მილიარდი ევროს ღირებულებისაა.

ჰუნანის გეოლოგიური ბიუროს ინფორმაციით, ვანგუს ოქროს საბადოში დადასტურდა 40-ზე მეტი ოქროს ძარღვი. უკვე დადასტურებულია, რომ 2000 მეტრის სიღრმეზე 300 ტონა ოქროს მოპოვება შესაძლებელია. ხოლო 3000 მეტრის სიღრმეზე ბურღვამ გამოავლინა დამატებითი მარაგი, რის შეფასებამაც საწყის მოლოდინს გადააჭარბა.

როგორც გეოლოგმა ჩენ რულინმა აღნიშნა, ბირთვის ბევრ ნიმუშში ოქროს ხილული კვალი იყო, რაც იშვიათია თანამედროვე საძიებო სამუშაოებში. ხოლო ზოგიერთი მადანი შეიცავდა 138 გრამამდე ლითონს, რაც ინდუსტრიის სტანდარტებით საოცრად მაღალი კონცენტრაციაა.

საბადო თავდაპირველად გამოვლინდა 3D გეოლოგიური მოდელირების, ღრმა ბირთვის ბურღვისა და გეოფიზიკური კვლევის დახმარებით. ეს ტექნოლოგიები მეცნიერებს საშუალებას აძლევს, მიწისქვეშა წარმონაქმნები ვიზუალურად გამოიკვლიონ და ოქროთი მდიდარი ტერიტორიები განსაზღვრონ.