„არ მინდა თქვენი ვარდი და ია, ჩემი საფლავის ქვაზე დაწერეთ, ჩემგან მოკლული რუსების სია...” - ლექსი, რომელიც აგვისტოს ომის გმირმა ტელეფონით შვილს წაუკითხა

2008 წლის აგვისტოს ომიდან 15 წელი გავიდა. ქვეყანა ტერიტორიული მთლიანობისთვის დაღუპულ გმირებს იხსენებს.

რუსეთის მიერ საქართველოსთან წარმოებულმა ომმა შეიწირა 228 მშვიდობიანი მოქალაქე, გარდაიცვალა 14 პოლიციელი, დაიჭრა 1 747 ადამიანი. საკუთარი საცხოვრებელი სახლი დატოვა 150 000-მდე ადამიანმა. დღემდე დევნილის სტატუსს ატარებს 30 000-მდე პირი. განადგურდა 35 ათასი საცხოვრებელი სახლი. მიწასთან გასწორდა 53 ქართული სოფელი. ოკუპირებულია 5 ხეობა და 125 სოფელი.

ფეისბუკ-გვერდი საქართველოს თავდაცვა სოციალურ ქსელში ავრცელებს ინფორმაციას  და აგვისტოს ომის კიდევ ერთ გმირს გვაცნობს. გელა მებაღიშვილი დაჭრილის გამოსაყვანად მიდიოდა, რა დროსაც ის ნაღმზე აფეთქდა. მანამდე მან თავის 14 წლის შვილს ტელეფონით ლექსი წაუკითხა:

”როცა მოვკვდები და აღარ ვიქნები,

რად მინდა თქვენი ვარდი და ია,

ჩემი საფლავის ქვაზე დაწერეთ,

ჩემი მოკლული რუსების სია” ...

ს ლექსი გელა მებაღიშვილმა თავის 14 წლის ბიჭუნას ტელეფონით წაუკითხა 10 აგვისტოს, გამთენიისას…

გელა მებაღიშვილი ვაზიანში, 41-ე ბატალიონის მესამე ასეულის სერჟანტად მსახურობდა… 2008 წელს, დაჭრილის გამოსაყვანად რომ შესულან, გელას ექიმისთვის უთქვამს, შენ იქით წადი, მე აქეთ წავალო. ექიმი საითაც წავიდა, იქით არ იყო ნაღმი, საითაც გელა წავიდა, იქ იყო ნაღმი და გელა აფეთქდა…

თვითონ ექიმიც საშინლად დაიჭრა, ხორცები ჰქონდა დაგლეჯილი. იმ ექიმმა ნახა გელა გარდაცვლილი, ერთადერთი ის იყო, ვინც ნახა, რომ ნაღმზე აფეთქდა… ექიმმა ვერ გამოიყვანა გელა, თვითონ დაჭრილი და განადგურებული იყო, ან როგორ გამოაღწია…

გელა ყვარელში, სოფელ გავაზში დაიბადა და გაიზარდა, მისდევდა სპორტს, მოჭიდავე იყო, ძიუდოისტი, საქართველოს ჩემპიონიც ყოფილა,” – აღნიშნულია ინფორმაციაში.