დასახელდა ყავის დღიური ნორმა, რომელიც შეიძლება სტრესის დონეს ამცირებდეს - კვლევა

ჩინეთში, მკვლევრების მიერ ჩატარებული ფართომასშტაბიანი კვლევის მიხედვით, ყავის ზომიერი მოხმარება შესაძლოა მენტალური ჯანმრთელობის გაუმჯობესებასთან იყოს დაკავშირებული და ამცირებდეს დეპრესიისა და მღელვარების განვითარების რისკს.

კვლევა, რომლის შედეგებიც გამოქვეყნდა ჟურნალში Journal of Affective Disorders, 461 000-ზე მეტ ადამიანს მოიცავდა. მონაწილეები კვლევის დასაწყისში ფსიქიკურად ჯანმრთელები იყვნენ და მათ საშუალოდ 13,4 წლის განმავლობაში აკვირდებოდნენ.

მონაცემების ანალიზმა აჩვენა, რომ იმ ადამიანებს, რომლებიც დღეში 2-3 ჭიქა ყავას სვამდნენ, მენტალური ჯანმრთელობის პრობლემები ყველაზე იშვიათად განუვითარდათ. შედარებით მაღალი რისკი დაფიქსირდა როგორც იმ პირებში, რომლებიც ყავას საერთოდ არ სვამდნენ, ისე მათში, ვინც დღეში სამ ჭიქაზე ნაკლებს მოიხმარდა.

ამასთან, კვლევის მიხედვით, დღეში ხუთი და მეტი ჭიქა ყავის მიღება უკვე დაკავშირებულია განწყობის აშლილობების გაზრდილ რისკთან. მკვლევრებმა ეს დამოკიდებულება ე.წ. „J-ს ფორმის კავშირად“ აღწერეს, რაც მიუთითებს, რომ საუკეთესო ეფექტი სწორედ ზომიერ მოხმარებას აქვს.

აღსანიშნავია, რომ მსგავსი შედეგები დაფიქსირდა ყავის სხვადასხვა ტიპის შემთხვევაში — დაფქული, ხსნადი და უკოფეინო ყავაც კი ანალოგიურ ტენდენციას აჩვენებდა. კვლევის თანახმად, დადებითი ეფექტი მამაკაცებში შედარებით უფრო გამოხატული იყო.

მკვლევრებმა ასევე გაითვალისწინეს ისეთი ფაქტორები, როგორიცაა ასაკი, განათლება, ფიზიკური აქტივობა და თანმხლები დაავადებები, რათა შედეგებზე მათი გავლენა მაქსიმალურად შეემცირებინათ. მიუხედავად ამისა, ავტორები აღნიშნავენ, რომ კვლევა მიზეზ-შედეგობრივ კავშირს პირდაპირ ვერ ამტკიცებს.

მეცნიერების შეფასებით, ყავა შეიცავს სხვადასხვა ბიოაქტიურ ნივთიერებას, რომელთაგან ნაწილს შესაძლოა ჰქონდეს ანთების საწინააღმდეგო და დამამშვიდებელი ეფექტი თავის ტვინის იმ უბნებზე, რომლებიც განწყობასა და სტრესთან არის დაკავშირებული.

კვლევის ავტორები ხაზს უსვამენ, რომ მიუხედავად მიღებული შედეგებისა, საჭიროა დამატებითი კვლევები, თუმცა არსებული მონაცემები მიუთითებს, რომ ყავის ზომიერი მოხმარება შეიძლება იყოს ერთ-ერთი მარტივი ფაქტორი, რომელიც მენტალური ჯანმრთელობის შენარჩუნებაში ხელს უწყობს.