,,ქართულ-ამერიკული ურთიერთობები უკიდურესად ნეგატიურ ნიშნულზეა და ამას ახალი ელჩი ვერ შეცვლის" - გიორგი კაპანაძე

ამერიკაში საქართველოს ელჩად თამარ ტალიაშვილის დანიშვნას ოპოზიციაში ეხმაურებიან. ხელისუფლების ოპონენტები კვლავ სკეპტიკურად არიან განწყობილი და, შექმნილი ვითარებიდან გამომდინარე, თბილისსა და ვაშინგტონს შორის ურთიერთობის გადატვირთვის მოლოდინი არ აქვთ.

"სამწუხაროა, რომ ქართულ-ამერიკული ურთიერთობები ამ მომენტისთვის არის უკიდურესად ნეგატიურ ნიშნულზე, არალეგიტიმური "ქართული ოცნების" მიერ, წლების განმავლობაში ანტიდემოკრატიული, ანტიქართულ და ანტიამერიკული პოლიტიკის გამო. ამიტომ, მას, ცხადია, ვერ შეცვლის ახალი ელჩი," - აცხადებს პარტიის "ერთიანობა - ნაციონალური მოძრაობის" პოლიტიკური საბჭოს წევრი, გიორგი კაპანაძე.

ცნობისთვის, საქართველომ ე.წ. აგრემანი, ანუ თანხმობა, დიპლომატიური წარმომადგენლობის ხელმძღვანელად ტალიაშვილის დანიშვნასთან დაკავშირებით ვაშინგტონისგან გუშინ მიიღო.