ეს ისტორიის დასასრული არ არის - ეს მოლაპარაკებების პროცესის პირველი ნაბიჯია, რომელიც გაგრძელდება - მაკრონი აშშ-ევროკავშირის სავაჭრო შეთანხმებაზე

საფრანგეთის პრეზიდენტი ემანუელ მაკრონი ევროკავშირსა და აშშ-ს შორის გაფორმებულ სავაჭრო შეთანხმებას აკრიტიკებს.

ევროკავშირსა და აშშ-ს შორის სავაჭრო შეთანხმების თანახმად, აშშ-ში ევროკავშირის თითქმის ყველა ექსპორტზე 15-პროცენტიანი ტარიფი დაწესდება.

„თავისუფალი რომ იყო, შიში უნდა შთააგონო. ჩვენი საკმარისად არ ეშინოდათ. საფრანგეთი ყოველთვის მტკიცე და მომთხოვნ პოზიციას იკავებდა. ის ასე გააგრძელებს. ეს ისტორიის დასასრული არ არის და ჩვენ ამით არ გავჩერდებით. ეს მოლაპარაკებების პროცესის პირველი ნაბიჯია, რომელიც გაგრძელდება“, – განაცხადა ემანუელ მაკრონმა.

ამავდროულად, საფრანგეთის პრეზიდენტმა თქვა, რომ შეთანხმების უპირატესობაა უზრუნველყოს ხილვადობა და პროგნოზირებადობა მოკლევადიან პერსპექტივაში.

„ეს იცავს საფრანგეთისა და ევროპის ინტერესებს: საბაჟო გადასახადებისგან გათავისუფლება ჩვენი ზოგიერთი ძირითადი საექსპორტო სექტორისთვის, მათ შორის აერონავტიკისთვის. არანაირი დათმობა ჩვენი სოფლის მეურნეობის სექტორებისთვის, არანაირი გამოწვევა ჩვენი მარეგულირებელი ავტონომიისთვის, ჩვენი ჯანმრთელობისა და გარემოსდაცვითი სტანდარტებისთვის. კომისიამ ეს უზრუნველყო”, – აღნიშნა ემანუელ მაკრონმა.