დღეში რამდენი ნაბიჯის გადადგმაა საჭირო რეალურად - იმაზე ცოტა, ვიდრე გგონიათ

 ალბათ, გაგიგიათ, რომ ადამიანმა ჯანმრთელობის შესანარჩუნებლად დღეში 10 000 ნაბიჯი უნდა გადადგას. ეს სულაც არაა ის რაოდენობა, რომელზეც მეცნიერები კვლევების შედეგად შეთანხმდნენ, არამედ 1960-იანი წლების მარკეტინგულ კამპანიას უკავშირდება, რომლის დროსაც სწორედ 10 000-იანი ნიშნულის მქონე პედომეტრი გამოუშვეს.

The Lancet-ში გამოქვეყნებული ახალი კვლევის ფარგლებში სპეციალისტებმა ეს საკითხი შეისწავლეს, რისთვისაც 57 ნაშრომი გააანალიზეს — 160 000-ზე მეტი ადამიანის მონაცემები. მეცნიერთა მიერ გამოყენებული მეთოდი სისტემური მიმოხილვის სახელითაა ცნობილი. ის შეჯერებული ინფორმაციის შედეგად იმ დეტალების გამოვლენის საშუალებას იძლევა, რომლებიც ცალკეულ კვლევაში შეიძლება გამორჩენოდათ.

მათ დაადგინეს, რომ 7000 ნაბიჯის გადადგმაც საკმარისია. რა თქმა უნდა, რაც უფრო მეტია რაოდენობა, მით უფრო იზრდება სარგებელიც, თუმცა ოპტიმალური ზღვარი ესაა. მსგავსი დატვირთვით ადამიანებში ნაადრევი სიკვდილის 47%-ით ნაკლები რისკი დაფიქსირდა ვიდრე მათში, ვინც მხოლოდ 2000 ნაბიჯზე ადიოდა.

ასევე, ეს დამატებით გვიცავს გულის პრობლემებისგან, სიმსივნისგან და დემენციისგანაც. გაირკვა ისიც, რომ ყოველდღიურად 2000-4000 ნაბიჯის გადადგმით სიკვდილის რისკი 36%-მდე მცირდება. ამის მიუხედავად, ყველაზე დიდი სარგებელი სწორედ 7000 ნაბიჯს მოაქვს.

 აქ ადამიანის ასაკიც გასათვალისწინებელია, რადგან 60 წელს გადაცილებულ პირებში მაქსიმალურად შედეგიანი დღეში 6000-დან 8000 ნაბიჯამდეა. უფრო ნაკლებ ასაკობრივ კატეგორიაში იმავე მიზნის მისაღწევად 8000-10 000 ნაბიჯი მეტად ეფექტიანია.

რაც შეეხება ამ რუტინის შენარჩუნებას, ერთ-ერთმა კვლევამ აჩვენა, რომ ყოველდღიური ნაბიჯების რაოდენობის მატება ადამიანებს მოტივაციას აკარგვინებს. მათ დაადგინეს, რომ 10 000-იან ნიშნულს ადამიანთა 85% ინარჩუნებდა, 12 500-მდე გაზრდამ ეს მაჩვენებელი 77%-მდე შეამცირა, მხოლოდ 15 000-მდე გაზრდილი ნაბიჯების მიზანს კი მხოლოდ მესამედი მიჰყვებოდა.

ასეა თუ ისე, ამდენი ნაბიჯის გადადგმა სულაც არ გვჭირდება და 10 000-ანი მიჯნის შემდეგ დამატებითი სარგებლის მიღებაც შედარებით მცირდება. საინტერესოა, რომ დღის განმავლობაში მოძრაობისას ისედაც საკმაოდ ბევრ ნაბიჯს ვდგამთ, მაგალითად: მანქანამდე მისვლისას, ოთახიდან ოთახში გადაადგილებისას, საზოგადოებრივი ტრანსპორტით სარგებლობისას და ყოველდღიური საქმეების შესრულებისას. შესაბამისად, მხოლოდ მიზანმიმართულად სასეირნოდ გამოყოფილი დროის მიხედვით არ უნდა ვიმსჯელოთ.

ეს ნიშნავს, რომ 7000 ნაბიჯის მისაღწევად რუტინის ძირფესვიანად შეცვლა, შესაძლოა, არც კი იყოს აუცილებელი, უბრალოდ მეტი მოძრაობა უნდა სცადოთ.