ახალგაზრდების დიდი ნაწილი თანატოლებთან ურთიერთობას ხელოვნურ ინტელექტთან საუბარს ამჯობინებს - კვლევა

ახალგაზრდების უმეტესობას ჩატბოტებთან კომუნიკაციის გამოცდილება აქვს. მათთვის ხელოვნურ ინტელექტთან საუბარი ისეთივე ბუნებრივია, როგორც ადამიანებთან. მათი მნიშვნელოვანი ნაწილისთვის კი ეს კიდევ უფრო სასიამოვნოა.

როგორ და რატომ იყენებენ მოზარდები ხელოვნური ინტელექტის კომპანიონებს? ეს არის კითხვა, რომელიც უნდა აინტერესებდეს ყველას, ვინ ფიქრობს, თუ როგორ განვითარდება საზოგადოება მომავალში.

რადგან ეს ტექნოლოგია ძალიან ცოტა ხანია არსებობს და სწრაფად ვითარდება, პასუხებს ნელა ვიღებთ. მედია ანალიზის კომპანია Common Sense Media-მ შეისწავლა, თუ როგორ ესაუბრებიან 13-დან 17 წლამდე ასაკის ახალგაზრდები ხელოვნურ ინტელექტს. შედეგები აჩვენებს, რომ ამ ასაკის ადამიანებში ხელოვნურ ინტელექტთან ყოველდღიური კავშირი ძალიან გავრცელებულია.

„ბავშვებსა და მოზარდებს არასდროს უგრძნიათ თავი ისე მარტოსულად, როგორც ახლა. ეს არის თაობა, რომელიც ადამიანებთან კომუნიკაციას, ხშირად ტექნოლოგიებთან კავშირში ცვლის", — აცხადებენ კვლევის ავტორები.

კვლევამ აჩვენა, რომ ხელოვნური ინტელექტის ასისტენტები გაცილებით უფრო გავრცელებულია, ვიდრე ეს შეიძლება გვეგონოს.

ახალგაზრდობა და ხელოვნური ინტელექტი
კვლევის თანახმად, მოზარდების დაახლოებით 72%-მა ხელოვნურ ინტელექტზე დაფუძნებული ჩატბოტები ერთხელ მაინც გამოიყენა. მეტიც, მათგან ნახევარზე მეტი ამ პლატფორმებს თვეში რამდენჯერმეც იყენებს.

მოზარდების დაახლოებით ერთი მესამედი ამ პროგრამებს სოციალური ურთიერთობებისთვის იყენებს, მათ შორის როლური თამაშებისთვის, რომანტიკული ურთიერთობებისთვის, ემოციური მხარდაჭერისთვისა და მეგობრობისთვის. მოზარდების ეს ნაწილი ხელოვნურ ინტელექტთან კომუნიკაციას უფრო დამაკმაყოფილებლად მიიჩნევს, ვიდრე ადამიანებთან საუბარს.

მეორე მხრივ, მოზარდები ხელოვნური ინტელექტის უარყოფით მხარეებსაც ხედავენ. ჩატბოტებთან საუბრის მსურველთა დაახლოებით მესამედი ამბობს, რომ გარკვეულ დისკომფორტს განიცდის ხელოვნურ ინტელექტთან ხშირად კომუნიკაციის გამო.

რისკები
ავტორები ამბობენ, რომ შედეგები მათ ადრინდელ ანალიზს ადასტურებს. მკვლევრებს მიაჩნიათ, რომ ხელოვნური ინტელექტის მქონე ჩატბოტებს მოზარდებზე ზედმეტად დიდი გავლენა აქვთ. ისინი 18 წლამდე მოზარდებს ურჩევენ, რომ მსგავს სისტემებზე დამოკიდებულები არ გახდნენ.

„მიუხედავად იმისა, რომ მოზარდებმა თავდაპირველად შეიძლება გართობისა და ცნობისმოყვარეობისთვის ხელოვნური ინტელექტის კომპანიონებს მიმართონ, ეს ტექნოლოგია უკვე მოქმედებს მათ სოციალურ განვითარებასა და სოციალიზაციაზე", - აღნიშნულია კვლევაში.

მკვლევრებს მიაჩნიათ, რომ ამ მიმართულებით დამატებითი კვლევებია საჭირო, რათა უფრო ზუსტი დასკვნების გაკეთების საშუალება გაჩნდეს.