მეცნიერებმა კატებისა და ძაღლების კოგნიტიური უნარები შეადარეს

მეცნიერების საერთაშორისო ჯგუფმა ძაღლებისა და კატების გონებრივი შესაძლებლობების შედარებითი ანალიზი ჩაატარა. კვლევის ფარგლებში შეისწავლეს ცხოველების სოციალური ინტელექტი, თვითშეგნება და ანგარიშის უნარი. კვლევის შედეგები BBC-ს ჟურნალში Science Focus გამოქვეყნდა.

ანალიზმა აჩვენა, რომ ძაღლებს თავის ტვინის ქერქში მეტი ნეირონი აქვთ. მაგალითად, ოქროსფერ რეტრივერს 623 მილიონი ნეირონი აქვს, მაშინ როცა კატებს 250 მილიონი, თუმცა სპეციალისტები ხაზს უსვამენ იმ ფაქტს, რომ ნეირონების რაოდენობა ინტელექტს არ განაპირობებს.

სოციალური ინტელექტი მიუწვდომელ საკვებზე რეაქციის შეამოწმებს. როდესაც ძაღლები ასეთ საკვებს ხედავდნენ, მზერა სასუსნავიდან ადამიანისკენ გადაჰქონდათ, რითაც საჭმლის მოპოვებაში დახმარებას ითხოვდნენ. კატები კი უმეტეს შემთხვევაში სასუსნავის მოსაპოვებლად დამოუკიდებლად მოქმედებდნენ, თუმცა რაღაც ნაწილი ადამიანის ყურადღების მისაპყრობად ვიზუალურ სიგნალებს მაინც იყენებდა.

კატებიც და ძაღლებიც ასხვავებდნენ საგნების რაოდენობას. ლეკვებიც და კნუტებიც ვიზუალურად ასხვავებდნენ სასუსნავის დიდ რაოდენობას პატარისგან. ტესტი თვითშეგნებაზე სარკის დახმარებით ვერცერთმა ჯგუფმა ვერ გაიარა - ორივე შემთხვევაში ცხოველებს ეგონათ რომ სარკეში სხვა არსებას ხედავდნენ და არა საკუთარ თავს.

საბოლოო ჯამში, მეცნიერებმა დაადგინეს, რომ ცხოველების ინტელექტი დამოკიდებულია მათ გენეტიკაზე, სოციალიზაციაზე, გამოცდილებაზე და ჯიშის თავისებურობებზე. სპეციალისტების დასკვნის მიხედვით, კატებსაც და ძაღლებსაც უნიკალური კოგნიტიური უნარები აქვთ და მათი შედარება ევოლუციური ადაპტაციისა და ქცევის განსხვავების გამო არაკორექტულად ითვლება.