დამოუკიდებელი ქართული ფეხბურთის ისტორიაში ყველაზე მნიშვნელოვანი გოლის გამტანი ნიკა კვეკვესკირი კარიერაში ახალ ეტაპს იწყებს

ნიკა კვეკვესკირმა ჟურნალისტებთან შეხვედრაზე განაცხადა, რომ 33 წლის ასაკში ფეხბურთელის კარიერა დაასრულა და ამიერიდან ეროვნული გუნდის სამწვრთნელო სტაფში იმუშავებს.

ნიკა კვეკვესკირი 1992 წლის 29 მაისს ზუგდიდში დაიბადა. პროფესიული კარიერა 2009 წელს ზუგდიდის „ბაიაში“ დაიწყო, ორ წლის შემდეგ კი „დინამო თბილისში“ მიიწვიეს, სადაც 4 წელი ითამაშა. გამოდიოდა „ცხინვალში“, გორის „დილაში“, აზერბაიჯანულ „ინტერსა“ და „გაბალაში“, ყაზახურ „ტობოლში“ და პოლონურ „ლეხში“, ბოლოს კი უნგრულ „ნირედიჰაზაში“ თამაშობდა.

იყო საქართველოს ყველა ასაკობრივი (17, 19 და 21-წლამდე) ნაკრების წევრი. ეროვნულ გუნდში პირველად 2015 წელს კახა ცხადაძემ მიიწვია და მას შემდეგ „ჯვაროსნების“ უცვლელი ფეხბურთელი გახდა. საქართველოს ეროვნული ნაკრების ფორმით ჩაატარა 62 მატჩი.

2024 წლის 26 მარტს ეროვნული გუნდის ისტორიაში ერთ-ერთი გამორჩეული გოლის ავტორი გახდა – ევრო 2024-ის საკვალიფიკაციო ეტაპის პლეი ოფის ფინალში საქართველოს ნაკრებმა საბერძნეთს მოუგო და ევროპის ჩემპიონატზე პირველად გავიდა. მატჩის ძირითადი და დამატებითი დრო 0:0 დასრულდა, პენალტების სერიაში კი საქართველოს ნაკრებმა მეტოქე 4:2 დაამარცხა – გადამწყვეტი პენალტი სწორედ ნიკა კვეკვესკირმა გაიტანა.

ნიკას ეს პენალტი დამოუკიდებელი ქართული ფეხბურთის ისტორიაში ყველაზე ემოციური და დასამახსოვრებელი მომენტი იყო. 2024 წლის ევროპის ჩემპიონატზე კვეკვესკირმა საქართველოს ნაკრების შემადგენლობაში ითამაშა.