გიორგი გველესიანი: დარწმუნებული ვარ, ახალწვეულები ნაკრებს დიდ დახმარებას გაუწევენ

„ჯვაროსნების“ მცველმა გიორგი გველესიანმა საქართველოს ნაკრების მზადებასა და მოახლოებული ამხანაგური მატჩების შესახებ ისაუბრა.

„ნაკრებში გამოძახება ყოველთვის სასიამოვნო და საამაყოა. ნებისმიერ მეტოქეს მაღალი პროფესიონალიზმით ვუდგებით. ისეთი პერიოდია, რომ ზოგ ფეხბურთელს შედარებით ადრე დაუსრულდა სეზონი. ჩვენთვის მნიშვნელოვანი იყო, რომ მაქსიმალურად შეგვენარჩუნებინა ფორმა და მზადყოფნაში შევხვედროდით ამ თამაშებს. შევისწავლით მეტოქეებს და ველოდებით ძალიან კარგ სპარინგებს.

მისასალმებელია, რომ ნებისმიერ ფეხბურთელს, რომელიც მზადყოფნაშია, ეძლევა ეროვნულ ნაკრებში თავის გამოჩენის შანსი. ყველაფერი მათზეა დამოკიდებული და დარწმუნებული ვარ, მომავალში ისინი აუცილებლად გამოადგებიან ნაკრებს“, – განაცხადა გიორგი გველესიანმა.

ივნისის სანაკრებო პაუზის ფარგლებში საქართველოს ნაკრები 5 ივნისს, „დინამო არენაზე“ ფარერის კუნძულების ნაკრებს უმასპინძლებს.

8 ივნისს. ქუთაისის „რამაზ შენგელია არენაზე“ ჩვენი გუნდის მეტოქე კაბო-ვერდეს ეროვნული ნაკრები იქნება. ორივე მატჩი 20:00 საათზე დაიწყება.