ანაკლიის ახალგაზრდულ ბანაკს თავდაცვის ძალების წარმომადგენლები ესტუმრნენ

ანაკლიის ახალგაზრდული ბანაკის ერთი დღე სამხედრო თემატიკას დაეთმო. თავდაცვის ძალების დასავლეთის სარდლობის მე-2 ქვეითი ბრიგადის სამხედროები ბანაკს ესტუმრნენ და სტუდენტებს ქართული ჯარის შესახებ პრეზენტაცია წარუდგინეს. ახალგაზრდებმა დეტალური ინფორმაცია მიიღეს თავდაცვის ძალების ისტორიის, სამხედრო სწავლებების, საქართველოს ეროვნული გმირების, სამხედრო განათლებისა და კარიერული განვითარების შესაძლებლობების შესახებ.

სამხედრო მოსამსახურეებმა ახალგაზრდებს წვევამდელთა ეროვნულ სამხედრო სამსახურში პირობები და არსებული ბენეფიტები გააცნეს. შეხვედრა კითხვა-პასუხის რეჟიმში წარიმართა.

მოგვიანებით, სტუდენტებმა ბანაკის ტერიტორიაზე გამოფენილი თავდაცვის ძალების ტექნიკა,შეიარაღება და სამხედრო აღჭურვილობა დაათვალიერეს. მათ საშუალება ჰქონდათ გაცნობოდნენ სამხედრო ტექნიკის ტაქტიკურ მონაცემებს და საინტერესო საკითხებზე დამატებითი ინფორმაცია მიეღოთ.

ახალგაზრდული ბანაკები საქართველოს განათლების, მეცნიერებისა და ახალგაზრდობის სამინისტროს სსიპ ახალგაზრდობის სააგენტოს ორგანიზებით ხორციელდება. ბანაკის როტაციისფარგლებში ერთი დღე თავდაცვის ძალების წარმომადგენლებთან შეხვედრას ეთმობა.

პროექტის მიზანია ახალგაზრდა თაობისთვის აქტიური დასვენების შესაძლებლობების შექმნა, ცხოვრების ჯანსაღი წესის პოპულარიზაცია და პატრიოტული სულისკვეთების გაღრმავება.