ადამიანებით ვაჭრობის გახმაურებული საქმე საფრანგეთში - ერთ-ერთი ბრალდებული ქართველია

საფრანგეთში, შამპანურის ბიზნესში დასაქმებული ყურძნის მკრეფავების სამუშაო პირობები ადამიანებით ვაჭრობის ბრალდებით დაწყებული გამოძიების ყურადღების ცენტრში მოექცა.

სამ ადამიანს - ყირგიზ ქალს, ქართველ მამაკაცს და ფრანგ მამაკაცს, ბრალი ედებათ 50-ზე მეტი სეზონური მუშის ექსპლუატაციაში, რომელთა უმეტესობა დასავლეთ აფრიკიდან არის.

მუშები, რომელთაგანაც ყველა არალეგალური მიგრანტია, 2023 წლის სექტემბერში, მოსავლის აღების დროს აღმოაჩინეს - ისინი ვიწრო ოთახებში, ანტისანიტარულ პირობებში ნესლ-ლე-რეპონში, რეიმსის სამხრეთ-დასავლეთით, შამპანის რეგიონის გულში, ერთ-ერთ შენობაში ცხოვრობდნენ.

მიგრანტები პარიზში მცხოვრები დასავლეთ აფრიკის სონინკეს ეთნიკური თემისთვის WhatsApp-ის ჯგუფური შეტყობინების საშუალებით დაიქირავეს. შეტყობინებაში მათ შამპანის რეგიონში "კარგად ანაზღაურებად სამუშაოებს" ჰპირდებოდნენ.