ზაზა ლომინაძე - ნარკომანიის ჩანაცვლების 40-ზე მეტი პუნქტი მოქმედებდა, ეს ყველაფერი სახელმწიფო სტრუქტურებში გადადის, პროგრამა უფასო იქნება

პარლამენტის ჯანდაცვის კომიტეტის თავმჯდომარის, ზაზა ლომინაძის განცხადებით, პარლამენტმა ნარკოპოლიტიკის გამკაცრების თვალსაზრისით მნიშვნელოვანი კანონპროექტი დაამტკიცა.

როგორც ზაზა ლომინაძემ საქართველოს პირველ არხს განუცხადა, ნარკოდამოკიდებული ადამიანებისთვის ნარკომანიის ჩანაცვლების პროგრამა უფასო იქნება.

გარდა ამისა, სახელმწიფო სრულად თავის თავზე იღებს ფსიქოტროპული ნივთიერებების იმპორტს.

„საქართველოში ნარკომანიის ჩანაცვლების 40-ზე მეტი პუნქტი მოქმედებდა, სადაც ნარკოდამოკიდებული ადამიანები ამა თუ იმ მედიკამენტებს იღებდნენ. იცვლება ის, რომ ეს ყველაფერი კერძოდან სახელმწიფო სტრუქტურებში გადადის, სადაც ზედამხედველობას სრულიად სახელმწიფო განახორციელებს. ვისაც ამაში თანხის გადახდა უწევდა, მათთვის დადებითი ის არის, რომ პროგრამა უფასო იქნება. მკურნალობას ყველა ის ადამიანი დაექვემდებარება, ვისაც მედიკამენტები სჭირდება. ამას გარდა, სახელმწიფო სრულად თავის თავზე იღებს ფსიქოტროპული ნივთიერებების იმპორტს. შემდეგ რეალიზაცია სააფთიაქო ქსელში ისე მოხდება, როგორც აქამდე ხდებოდა. ამით კერძო და ფინანსური ინტერესები გამოირიცხება. იქნება სურათი იმის, რომ სახელმწიფოს უფლებამოსილებაში იქნება, როგორც მათი შემოტანა, ისე განაწილება და, რა თქმა უნდა, ნარკოდამოკიდებული მოქალაქეების მკურნალობა“, – განაცხადა ზაზა ლომინაძემ.