ლევან ხაბეიშვილს საკუთარი თავის დაწინაურება უნდა და ამისთვის რადიკალური ნიშა დაიკავა, ხმამაღალი განცხადებებით გამოდის, პერსპექტივა აქვს, რომ მშვიდობიანად დააკავებენ - გია ვოლსკი

ლევან ხაბეიშვილს საკუთარი თავის დაწინაურება უნდა და ამისთვის რადიკალური ნიშა დაიკავა, ხმამაღალი განცხადებებით გამოდის, პერსპექტივა აქვს, რომ მშვიდობიანად დააკავებენ, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

მისივე თქმით, სახელმწიფოსთან დაპირისპირებას შესაბამისი რეაგირება მოჰყვება.

„მშვიდობიანი შეიძლება, იყოს დაკავება და მშვიდობიანი სასამართლო იყოს, მაგრამ მშვიდობიანი დამხობა არ არსებობს. მშვიდობიანი რეაგირება არსებობს ყველანაირ დანაშაულზე, რომელიც საქართველოს წინააღმდეგ იქნება ჩადენილი. თუ ავადმყოფ, ცხელ თავში მოფიქრებული იდეის განხორციელებას შეეცდება, სახელმწიფოს დაუპირისპირდება, რაზეც შესაბამისი რეაგირება იქნება.

ლევან ხაბეიშვილის განცხადებები სხვა მიზანს ემსახურება, „ნაცმოძრაობას“ ლიდერობა არავინ ჩამოართვას. ისე ჯერ კიდევ ამ პარტიაში რაღაცას წარმოადგენს იმ უბედურების შემდეგ, რაც თავის თავს გაუკეთა „ქურქუმალ ვაითზე“ საუბრით. მას საკუთარი თავის დაწინაურება უნდა და ამისთვის რადიკალური ფრთა შეარჩია, როგორც ნიშა. ლევან ხაბეიშვილი სპორტდარბაზში შევიდა და გვაჩვენა, კრივში როგორ ემზადება, ასევე როგორ ასკდება პოლიციელებს და ახალგაზრდებს დაპირისპირებისკენ როგორ მოუწოდებდა. რაღაც ნიშა დაიკავა, რითაც ფიქრობს, რომ უფრო ძლიერი გამოჩნდება. მას უნდა პოლიტიკური ფიგურა იყოს, ვერ არის და ხმამაღალი განცხადებებით გამოდის. რა პერსპექტივა გააჩნია? – იმის პერსპექტივა აქვს, რომ მშვიდობიანად დააკავებენ“, – განაცხადა ვოლსკიმ.