"ხაზარაძე-ჯაფარიძის პარტნიორის მხრიდან ვაშინგტონის არბიტრაჟის დაკისრებული თანხის გადახდა, მკაფიო დასტურია იმის, რომ ისინი ეთანხმებიან არბიტრაჟს გადაწყვეტილებას" - ბექა ძამაშვილი

"კიდევ ერთი დასტური, რომ ხაზარაძე-ჯაფარიძემ და მათმა პარტნიორმა საერთაშორისო არბიტრაჟებში მარცხი აღიარეს", - ასე აფასებს "ქართული ოცნება" ბობ მეიერის მიერ ვაშინგტონში წაგებული თანხის საქართველოსთვის გადახდას.

საუბარია 6.5 მილიონ დოლარზე, რომელიც ხაზარაძე-ჯაფარიძის ამერიკელ პარტნიორს არბიტრაჟმა დააკისრა. კანონმდებლობით, მათ გადაწყვეტილების გასაჩივრება შეეძლოთ, თუმცა ეს არ გააკეთეს.

დღეს, ასევე ცნობილი გახდა, რომ იუსტიციის სამინისტროს მიერ საარბიტრაჟო დავებზე "ანაკლიის განვითარების კონსორციუმი საქართველოს წინააღმდეგ" და "ბობ მეიერი საქართველოს წინააღმდეგ" - მიღებული მომსახურების ფარგლებში იურიდიული კომპანიისთვის გადარიცხული თანხა 63 მილიონ ლარს შეადგენს.

"ხაზარაძე-ჯაფარიძის პარტნიორის მხრიდან, ვაშინგტონის არბიტრაჟს გადაწყვეტილების შესრულება, ანუ დაკისრებული თანხის გადახდა, ძალიან მკაფიო დასტურია იმის, რომ ისინი ეთანხმებიან არბიტრაჟის გადაწყვეტილებას. იმას, რომ მთლიანად ანაკლიის პორტის ვერგანხორციელება იყო მათი ბრალეულობა, სახელმწიფოს რაიმე კუთხით მათთვის ხელი არ შეუშლია და ფაქტობრივად, მათ ამ პროცედურული მოქმედებით, ეს ყველაფერი თვითონ დაადასტურეს. როდესაც ადამიანმა იცის, რომ მართალია, ის ყველა შესაძლებლობას და სამართლებრივ მექანიზმს იყენებს, ის აუცილებლად გაასაჩივრებდა და ბოლომდე შეეცდებოდა საკუთარი სიმართლის დაცვას. მაგრამ, მყისიერად არბიტრაჟს გადაწყვეტილების შესრულება ადასტურეს, რომ მათ თავიდანვე იცოდნენ, ამ საქმეში სახელმწიფო იყო მართალი, უბრალოდ, გარკვეული პოლიტიკური დივიდენდების მიღების მიზნით გამოიყენეს ეს საქმეები. ასევე, ყურადღება უნდა გავამახვილოთ სახელმწიფოს მიერ გაწეულ ხარჯებზე. ფაქტობრივად, შეიძლება ითქვას, რომ ის რამდენიმე ათეული მილიონი, რომელიც სახელმწიფოს დასჭირდა ამ დავის საწარმოებლად, მათ კისერზეა. მთლიანად, ხარჯები იყო 63 მილიონი ლარის ოდენობით", - განაცხადა საქართველოს იუსტიციის მინისტრის მოადგილემ ბექა ძამაშვილმა.