"გულდასაწყვეტია, რომ ის არამეგობრული აქტი, რომელიც კონგრესმა მიიღო, ხდება ოპოზიციის მხრიდან მადლიერების საფუძველი, სამწუხაროა, რომ დღევანდელ აქციაზე სხვა ქვეყნის დროშები უფრო მეტია, ვიდრე საქართველოსი" - ლადო ბოჟაძე

საპროტესტო აქციას, რომელიც დღეს შედგა და აშშ-ის საელჩოსთან დასრულდა,  "ქართული ოცნება" გამოეხმაურა. მმართველ პარტიაში ამბობენ, რომ ოპოზიციის მიზანი საზოგადოების შეცდომაში შეყვანაა. მათივე თქმით, მიუღებელია იმ დოკუმენტის მხარდაჭერა, რომელიც ქვეყნის საწინააღმდეგოდაა მიღებული.

"უკვე 6 თვეა არჩევნების მერე გასული და საზოგადოება კარგად ხედავს, რომ ოპოზიცია მანამდე ატყუებდა, თითქოს ერთიანები იყვნენ და გაიმარჯვებდნენ, ახლა უკვე 6 თვეა ატყუებენ, რომ არჩევნები გაყალბდა. უკვე საზოგადოება კარგად ხედავს იმ სიმართლეს, რაც თავიდანვე ცნობილი იყო - ჩვენ ყველას გვახსოვს ის რადიკალური აქციები, დაპირისპირება პოლიციასთან, თუმცა ახლა უკვე ვხედავთ იმ რაოდენობას ადამიანებისა, რომლებიც მხოლოდ პოლიტიკური და ვიწრო პარტიული ინტერესის გამო ატარებენ აქციებს და რეალურად, ხდება აქციების მარგინალიზაცია, რადგან საზოგადოებამ კარგად დაინახა, რომ არანაირ ევროპულ მომავალს საფრთხე არ ემუქრება, რომ მელიას, გვარამიას, ვადაგასული პრეზიდენტის და ა.შ. იმედზე ყოფნა არ შეიძლება, ისინი საქართველოს მომავლისთვის კი არა, საქართველოს წარსულში დაბრუნებისთვის იბრძვიან.

რაც შეეხება დღევანდელ აქციას, რა თქმა უნდ, გულდასაწყვეტია, რომ ის არამეგობრული აქტი, რომელიც კონგრესმა მიიღო, ახლა უკვე გვხვდება ოპოზიციის მხრიდან მადლიერების გადახდის საფუძველი და სამწუხაროა, რომ დღევანდელ აქციაზე სხვა ქვეყნის დროშები უფრო მეტი იხილა საზოგადოებამ, ვიდრე საქართველოს დროშები", - აცხადებს პარლამენტის გარემოს დაცვისა და ბუნებრივი რესურსების კომიტეტის თავმჯდომარის პირველი მოადგილე ლადო ბოჟაძე.