ზელენსკი აცხადებს, რომ კიევში რუსეთის იერიშის ადგილას სამაშველო სამუშაოები დასრულებულია, რვა პირის ბედი კი ამ დრომდე გაურკვეველია

უკრაინის პრეზიდენტი ვოლოდიმირ ზელენსკი აცხადებს, რომ კიევში რუსეთის იერიშის ადგილას სამაშველო სამუშაოები დასრულებულია.

პრეზიდენტის თქმით, რვა ადამიანის ბედი ამ დრომდე გაურკვეველია.

„კიევში დარნიცკის რაიონში საცხოვრებელ სახლზე რუსეთის დარტყმის ადგილას სამაშველო სამუშაოები დასრულდა. გრძელდება დანგრეული კონსტრუქციების გასუფთავება. ამჟამად ცნობილია მხოლოდ თავდასხმის ერთ ადგილას 22 გარდაცვლილის შესახებ, მათ შორის ოთხი ბავშვია. ყველაზე უმცროსი გოგონა სამ წლამდე ნაკლები ასაკისაა“, – აღნიშნა ზელენსკიმ.

უკრაინის პრეზიდენტის ცნობით, 28 აგვისტოს რუსეთის ძალების იერიშის კიევზე სულ 23 ადამიანი იმსხვერპლა, კიდევ 53 მოქალაქე დაშავდა. ზელენსკის თქმით, რუსეთმა პასუხი უნდა აგოს ამ დარტყმაზე, ისევე როგორც სხვა თავდასხმებზე უკრაინაზე.

„როდესაც დიპლომატიის ნაცვლად, რუსეთი ირჩევს ბალისტიკას, აგრძელებს „შაჰედების“ მოდერნიზებას მკვლელობებისთვის და ავითარებს თანამშრომლობას ისეთ სუბიექტებთან, როგორიცაა ჩრდილოეთ კორეა, ეს ნიშნავს, რომ მსოფლიოს შესაბამისი რეაგირება უნდა ჰქონდეს. საჭიროა მკაცრი სანქციები, ძლიერი ზეწოლა, მკაცრი ნაბიჯები, რათა მკვლელებმა დაუსჯელობა არ იგრძნონ. რუსეთი მხოლოდ ძალის ესმის და ძალის დემონსტრირება ახლა აუცილებელია“, – განაცხადა

ზელენსკიმ აღნიშნა, რომ ასეთ ძალას ფლობენ აშშ, ევროპა და „დიდი ოცეულის“ ქვეყნები.