ქალი, რომელსაც სახეზე ძლიერი გამონაყარი აქვს, აცხადებს, რომ 22 წელია მაკიაჟი არ მოუშორებია - ფოტოები

37 წლის ქალის ფოტოები ვირუსულად გავრცელდა მას შემდეგ, რაც გაამხილა, რომ 22 წელია მაკიაჟი არ მოუშორებია, რამაც საბოლოოდ სახეზე ძლიერი გამონაყარი გამოიწვია. 

გაოს სახელით ცნობილი ჩინელი ქალი სოციალურ მედიაში საკუთარ ისტორიას ავრცელებდა, რათა სხვებისთვის გაფრთხილება მიეცა მაკიაჟის წასმასა და სახის მოვლასთან დაკავშირებით. როგორც ამბობენ, თავად ქალი ამას 20 წელზე მეტი ხნის განმავლობაში არ აკეთებდა, რამაც საბოლოოდ სერიოზული ალერგიული რეაქცია გამოიწვია.

გაიომ მაკიაჟის ტარება 15 წლის ასაკში დაიწყო. თუმცა, მაკიაჟის მოცილება მისთვის „ძალიან პრობლემური“ აღმოჩნდა და ამ პრინციპით ხელმძღვანელობდა: „რატომ უნდა მოიშორო მაკიაჟი, თუ მეორე დღეს ისევ უნდა წაისვა?“. ამიტომ, სახეს  დაძინებამდე წყლით იბანდა და მეორე დღეს ისევ მაკიაჟს ისვამდა.

მიუხედავად იმისა, რომ წლების განმავლობაში აკნეს ებრძოდა, გაოს თქმით, მისი კანი შედარებით კარგ მდგომარეობაში იყო, სანამ წელს სერიოზული ალერგიული რეაქცია არ განუვითარდა, რამაც სახის შეშუპება და დეფორმაცია გამოიწვია იმ დონემდე, რომ მისი ამოცნობა შეუძლებელი გახდა. დერმატოლოგთან ვიზიტის ნაცვლად, ის სამედიცინო ესთეტიკის კლინიკაში წავიდა „კანის გამაძლიერებელი“ ინექციისთვის, რამაც, მისი თქმით, მხოლოდ გააუარესა მდგომარეობა და კანს იისფერი ელფერი შესძინა. 

„ქავილი აუტანელია... ყოველდღე სახლში ვიმალები. გარეთ გასვლას ვერ ვბედავ.  მთელი სახე დანაოჭებული და საშინელი მაქვს. გარეთ გასვლას, ხალხთან შეხვედრას ან მეგობრების შეძენას ვერ ვბედავ. ყველაზე უარეს შემთხვევაში, გამონაყარი ათასობით პაწაწინა ჭიანჭველას ჰგავს, რომლებიც სახეზე დაცოცავენ“,- აღიარა გაომ ვიდეოში.

გაო მოკრძალებულ ოჯახში გაიზარდა და ხანდახან იაფფასიან ტონალურ კრემს იყენებდა, რამაც, მისი აზრით, ამჟამინდელი მდგომარეობა გამოიწვია. თუმცა, დერმატოლოგები სკეპტიკურად არიან განწყობილნი, რომ მაკიაჟს მისი სიმპტომების გამოწვევა შეეძლო, მიუხედავად იმისა, თუ რამდენად უხარისხო იყო მისი სახის მოვლის რიტუალი. ზოგი მიიჩნევს, რომ მისი სიმპტომები სხვა მრავალი მიზეზით იყო გამოწვეული, როგორიცაა როზაცეა და დერმატიტი. 

„ოცდაორი წლის განმავლობაში სათანადო წმენდის გარეშე ყოფნა, რა თქმა უნდა, ცუდია, მაგრამ ის, რასაც აქ ვხედავთ, უფრო რთულია. შესაძლოა, საქმე გვქონდეს აგრესიული პროდუქტების ნაზავთან, სტეროიდების შესაძლო ბოროტად გამოყენებასთან ან განმეორებით ინექციებთან“,- განაცხადა დერმატოლოგმა.