ხელოვნურ ინტელექტს ახალი მედიკამენტების დასამტკიცებლად გამოიყენებენ - რევოლუცია მედიცინაში

საკვებისა და წამლის მარეგულირებელმა სააგენტომ (FDA) ახლახან გამოაცხადა, რომ ხელოვნური ინტელექტის (AI) ყველა დეპარტამენტში გამოყენებას დაუყოვნებლივ დაიწყებს. ეს მას შემდეგ გადაწყვიტა, რაც სამეცნიერო შემფასებლებისთვის AI-ის ახალი პროგრამა შექმნეს.

ვარაუდობენ, რომ ხელოვნური ინტელექტი FDA-ის მიერ წამლების მიმოხილვის პროცესს დააჩქარებს. ის იმ დროს შეამცირებს, რასაც მეცნიერები რუტინულ და განმეორებად საქმეზე ხარჯავენ. იმის გათვალისწინებით, რომ AI ხშირად მცდარ პასუხებს იძლევა, ამ პროგრამას სერიოზული განხილვა სჭირდება.

"ეს გარდამტეხი ტექნოლოგიაა. მან მიმოხილვის ის დავალებები, რომელთა შესრულებას ადრე სამი დღე სჭირდებოდა, რამდენიმე წუთში შემასრულებინა", — განაცხადა ძინჭუნგ ლიოუმ, რომელიც წამლების შეფასებისა და კვლევის ცენტრის (CDER) დირექტორის მოადგილეა.

FDA-ის წარმომადგენელმა, მარტინ მაკარიმ, განკარგულება გასცა, რომ სააგენტოს ყველა ცენტრმა 30 ივნისამდე ხელოვნური ინტელექტის გამოყენება უნდა დაიწყოს. ეს დრო ბევრისთვის ზედმეტად თამამი და არარეალურია.

"ამ დროისთვის ყველა ცენტრი დაცულ გენერაციულ AI სისტემაზე იმუშავებს, რომელიც FDA-ის შიდა მონაცემთა პლატფორმებთან იქნება დაკავშირებული", — ნათქვამია სააგენტოს განცხადებაში.

აღნიშნული განცხადება მას შემდეგ გამოქვეყნდა, რაც Wired-მა ინფორმაცია გაავრცელა, რომ FDA და OpenAI სააგენტოში AI-ის გამოყენების თაობაზე მოლაპარაკებებს აწარმოებდნენ. აღსანიშნავია, რომ FDA-ის განცხადებაში OpenAI-ს ან მისი შესაძლო ჩართულობის შესახებ არაფერია ნათქვამი. 

მიუხედავად ამისა, Wired-ის წყაროები იუწყებიან, რომ ბოლო კვირებში ChatGPT-ის შემქმნელმა გუნდმა FDA-სთან და ილონ მასკის ე.წ. სახელმწიფო ეფექტიანობის დეპარტამენტის ორ წარმომადგენელთან არაერთი შეხვედრა გამართა. საუბარი პროექტს, სახელად cderGPT, ეხებოდა. ამ სახელწოდების უკან, სავარაუდოდ, CDER იგულისხმება, რომელიც აშშ-ში გაყიდვად წამლებს არეგულირებს.

Wired აღნიშნავს, რომ ეს ყველაფერი დიდი ხნის დაგეგმილი პროცესის ნაწილია. ჯერ კიდევ 2023 წელს FDA-მ სტიპენდია დააფინანსა, რომელიც მიზნად შიდა მოხმარებისთვის დიდი ენობრივი მოდელების (LLMs) შექმნას ისახავდა.

FDA-ის ყოფილი წარმომადგენლის, რობერტ კალიფის თქმით, სააგენტოს მიმოხილვის გუნდები ხელოვნურ ინტელექტზე მუშაობას უკვე წლებია რაც ცდილობენ.

"საინტერესო იქნება გავიგოთ, შემოწმების რომელი ნაწილი იქნება AI-ს მიერ შესრულებული", — ამბობს კალიფი — "ყოველთვის გვქონდა სურვილი, რომ ეს პროცესი შეგვემოკლებინა. ახლა ამაში ხელოვნური ინტელექტი დაგვეხმარება. დამტკიცებამდე საბოლოო შეფასება უფრო ფართო შესაძლებლობების მხოლოდ ერთი ნაწილია".

სააგენტო ხელოვნური ინტელექტის გამოყენებას თავისი საქმიანობის სხვა ასპექტებშიც განიხილავდა. მარტინ მაკარი, რომელიც პრეზიდენტმა დონალდ ტრამპმა წარმომადგენლის თანამდებობაზე დანიშნა, ტექნოლოგიის მიმართ ენთუზიაზმით გამოირჩევა.

"რატომ სჭირდება ახალ წამალს ბაზარზე გამოსასვლელად ათ წელზე მეტი?" — დაწერა მან — "რატომ არ გვაქვს ეს პროცესი გამარტივებული ხელოვნური ინტელექტითა და სხვა ტექნოლოგიებით?"

FDA-ის სიახლე ფართო ტენდენციას უკავშირდება. სურთ, რომ ხელოვნური ინტელექტის გამოყენება ფედერალურ უწყებებშიც დაიწყონ. ეს განსაკუთრებით შესამჩნევი ტრამპის ადმინისტრაციის დროს გახდა. მარტში OpenAI-მ თავისი ჩატბოტის სპეციალური ვერსია წარადგინა, ChatGPT Gov, რომელიც საკმარისად დაცულია, რომ მთავრობის ინფორმაცია დაამუშაოს. ილონ მასკმა აშშ-ის გენერალური მომსახურების ადმინისტრაციისთვის კიდევ ერთი AI ჩატბოტის განვითარება დააჩქარა.

ყველაფრის მიუხედავად, ხელოვნური ინტელექტის მედიცინაში გამოყენება სერიოზულ რისკებთანაა დაკავშირებული. Wired-თან საუბარში FDA-ის ყოფილი თანამშრომელი, რომელმაც ChatGPT კლინიკურ ინსტრუმენტად გამოცადა, აღნიშნავს, რომ ჩატბოტს "დამაჯერებელი ტყუილების“ მოფიქრება ხშირად უყვარს. ეს პრობლემა ასე მარტივად არ გაქრება.

"ვინ იცის, ეს პლატფორმა მიმომხილველებისთვის რამდენად ეფექტური იქნება", — უთხრა მან გამოცემას.