ღაზაში სიკვდილიანობისა და ნგრევის დონე ბოლო დროს უპრეცედენტოა. შიმშილი აღარ არის მოსალოდნელი შესაძლებლობა, ეს დღევანდელი კატასტროფაა - ანტონიო გუტიერეში

ისრაელის სამხედროები ქალაქ ღაზას ასაღებად ემზადებიან. პალესტინური ანკლავის ყველაზე დიდ ურბანულ ცენტრს ნეთანიაჰუს მთავრობა "ჰამასის" მებრძოლების უკანასკნელ ბასტიონად განიხილავს.

საერთაშორისო საზოგადოება კვლავ მოუწოდებს ისრაელს, უარი თქვას ქალაქ ღაზაში სახმელეთო ოპერაციაზე, რადგან შიშობენ, რომ შეტევა მნიშვნელოვან მსხვერპლს გამოიწვევს.

ისრაელს საომარი მოქმედებების შეწყვეტისკენ კიდევ ერთხელ მოუწოდებს გაეროს გენერალური მდივანიც. ცნობილია, რომ ომის დაწყებიდან დღემდე ღაზაში გარდაცვლილთა რიცხვმა თითქმის 63 000-ს მიაღწია.

"ღაზა ნანგრევებით, გვამებით და საერთაშორისო სამართლის სერიოზული დარღვევების მაგალითებითაა სავსე. "ჰამასის" და სხვა ჯგუფების მიერ აყვანილი მძევლები უნდა გაათავისუფლონ და ის სასტიკი მოპყრობა, რომლის ატანაც მათ მოუხდათ, უნდა შეწყდეს. მშვიდობიანი მოსახლეობა უნდა იყოს დაცული.

მოდით, ნათლად ვთქვათ, რომ ღაზაში სიკვდილიანობისა და ნგრევის დონე ბოლო დროს უპრეცედენტოა. შიმშილი აღარ არის მოსალოდნელი შესაძლებლობა, ეს დღევანდელი კატასტროფაა - ხალხი შიმშილით იღუპება. ოჯახები იძულებით გადაადგილებისა და სასოწარკვეთილების გამო ინგრევა. ორსული ქალები ნებისმიერი წარმოსადგენი რისკის წინაშე დგანან და სიცოცხლის შენარჩუნების სისტემები - საკვები, წყალი, ჯანდაცვა, მთლიანად მოშლილია. ეს არის ფაქტები ადგილზე და ისინი განზრახ მიღებული გადაწყვეტილებების შედეგია, რომლებიც ეწინააღმდეგება ძირითად ადამიანურობას.

ისრაელი უნდა დაეთანხმოს და ხელი შეუწყოს ჰუმანიტარული დახმარების გაცილებით ფართო ხელმისაწვდომობას. მან უნდა დაიცვას მშვიდობიანი მოსახლეობა და სამოქალაქო ინფრასტრუქტურა", - განაცხადა გაერთიანებული ერების ორგანიზაციის გენერალური მდივანმა ანტონიო გუტიერეშმა.