გერმანიის საგარეო საქმეთა მინისტრი: საფრანგეთმა თავდაცვაზე ხარჯები უნდა გაზარდოს, იმ შემთხვევაშიც კი, თუ ეს სხვა სახის ხარჯების შემცირებას ნიშნავს

გერმანიის საგარეო საქმეთა მინისტრმა, იოჰან ვადეფულმა განაცხადა, რომ საფრანგეთმა თავდაცვაზე ხარჯები უნდა გაზარდოს, იმ შემთხვევაშიც კი, თუ ეს სხვა სახის ხარჯების შემცირებას ნიშნავს.

ვადეფულის განცხადება, სავარაუდოდ, კიდევ უფრო გაამწვავებს ბერლინსა და პარიზს შორის არსებულ დაძაბულობას იმ ფონზე, როდესაც კანცლერი ფრიდრიხ მერცი და პრეზიდენტი ემანუელ მაკრონი ერთმანეთს ღიად დაუპირისპირდნენ ყველა საკითხზე - დაწყებული ვაჭრობით და დასრულებული საერთო სესხებით.

გერმანელი მაღალჩინოსნები სულ უფრო ხშირად აკრიტიკებენ მაკრონს იმის გამო, რომ ის ენთუზიაზმით საუბრობს აშშ-ისგან ევროპის სტრატეგიული ავტონომიის აუცილებლობაზე, თუმცა, მათი აზრით, ამ რიტორიკას საქმით არ ამყარებს და თავდაცვის ხარჯებს საკმარისად არ ზრდის.

„[მაკრონი] ხშირად და მართებულად საუბრობს ევროპული სუვერენიტეტისკენ ჩვენს სწრაფვაზე“, - განაცხადა ვადეფულმა ორშაბათს, გერმანიის საზოგადოებრივ რადიოსთან ინტერვიუში. „ვინც ამაზე საუბრობს, შესაბამისადვე უნდა იმოქმედოს საკუთარ ქვეყანაში. სამწუხაროდ, საფრანგეთის რესპუბლიკის ძალისხმევა ამის მისაღწევად ჯერჯერობით არასაკმარისია“.

„ამიტომ, ჩვენ მოვუწოდებთ საფრანგეთს, გააკეთოს ის, რასაც ჩვენ ვაკეთებთ აქ - რთული დისკუსიების ფასად შექმნას საინვესტიციო შესაძლებლობები, მათ შორის სოციალურ სექტორშიც; გაატაროს სიმკაცრის ერთი ან ორი ღონისძიება და დაზოგოს სახსრები სხვა სფეროებშიც, რათა გაჩნდეს ის აუცილებელი სივრცე, რომელიც საჭიროა ევროპული თავდაცვისუნარიანობის სასიცოცხლოდ მნიშვნელოვანი მიზნის მისაღწევად“, - განაცხადა ვადეფულმა.