გეოლოგმა დედამიწაზე უძველესი წყალი იპოვა და დალია - რა იგრძნო

პროფესორმა ბარბარა შერვუდ ლოლარმა და მისმა გუნდმა კანადის ერთ-ერთი მაღაროს ზედაპირის ქვეშ დედამიწაზე უძველესი წყალი აღმოაჩინეს. წყალი, რომელიც დაახლოებით სამი კილომეტრის სიღრმეზე მდებარეობს, 1,5-დან 2,6 მილიარდ წლამდე ასაკისაა. თუმცა, ყველაზე შთამბეჭდავი ის არის, რომ მეცნიერმა თავად დალია იგი. ამის შესახებ Daily Galaxy იტყობინება. შემთხვევა 2016 წელს მოხდა.

„როდესაც ადამიანები ამ წყალზე ფიქრობენ, ისინი ფიქრობენ, რომ ეს, ალბათ, კლდეში ჩარჩენილი წყლის მცირე რაოდენობაა. სინამდვილეში კი ის ძალიან ძლიერი ნაკადით მოდის პირდაპირ თქვენკენ“, - განმარტა მკვლევარმა.

როდესაც შერვუდმა წყალი გასინჯა, მან აღნიშნა, რომ ის „ძალიან მარილიანი და მწარე“ იყო. გაცილებით მარილიანი, ვიდრე ზღვის წყალი.

„მისნაირი გეოლოგებისთვის ასეთი მაღალი მარილიანობა იმედისმომცემი ნიშანი იყო. უფრო მარილიანი წყალი, როგორც წესი, უფრო ძველია და ეს ადასტურებდა წყლის უძველეს წარმოშობას. სინამდვილეში, რაც უფრო დიდხანს რჩება წყალი მიწისქვეშ, მით უფრო მარილიანი ხდება ის, რადგან მინერალები დროთა განმავლობაში მასში იხსნება“, - ხაზგასმულია სტატიაში.

ლოლარის გუნდმა რევოლუციური აღმოჩენაც გააკეთა. წყლის შემადგენლობის ანალიზით, მეცნიერებმა მიკრობული სიცოცხლის კვალი აღმოაჩინეს. აღმოჩნდა, რომ ეს მიკრობები წყალში მილიარდობით წლის განმავლობაში არსებობდა.

წყლის სპეციფიკური გემოს მიუხედავად, მეცნიერმა ამ წყლის დალევისგან რაიმე უარყოფითი შედეგი არ იგრძნო.