დენის შმიგალი აცხადებს, რომ ბელგია უკრაინას სამხედრო დახმარების სახით დამატებით 100 მილიონ ევროს გამოუყოფს

ბელგია უკრაინას 2025 წელს დამატებით სამხედრო დახმარებას გამოუყოფს 100 მილიონი ევროს ოდენობის. ამის შესახებ სოციალურ ქსელში უკრაინის თავდაცვის მინისტრმა, დენის შმიგალმა დაწერა.

მისივე ცნობით, აღნიშნულ სამხედრო დახმარებას ბელგია უკრაინას გამოუყოფს ნატო-ს ახალი ინიციატივის „უკრაინის საჭიროებების პრიორიტეტული სიის“ ფარგლებში.

როგორც შმიგალმა აღნიშნა ამ თანხის გამოყოფა მოხდება დამატებით იმ ერთი მილიარდი ევროს ოდენობის სამხედრო დახმარებასთან, რომელიც ბელგიამ უკვე გამოუყო უკრაინას.

„მადლობელი ვარ ჩემი კოლეგის, თეო ფრანკენის, ასევე ბელგიელი ხალხის და მთავრობის უკრაინის მხარდაჭერისთვის“, – წერს შმიგალი.

ცნობისთვის, აშშ-მა და ნატომ აამოქმედეს უკრაინისთვის ამერიკული იარაღის მიწოდების ახალი მექანიზმი „უკრაინის საჭირობების პრიორიტეტული სია“, რომელიც ითვალისწინებს დაფინანსებას ალიანსის სხვა წევრების შენატანებით.