ისტორიაში პირველად, პაციენტს ერთდროულად COVID-19, მაიმუნის ყვავილი და აივ ინფექცია დაუდგინდა

ახალ კვლევაში მეცნიერები უნიკალური სამედიცინო შემთხვევის შესახებ გვიყვებიან, კერძოდ, 36 წლის პაციენტზე, რომელსაც ერთდროულად COVID-19, მაიმუნის ყვავილი და აივ-ინფექცია დაუდგინდა. ეს მსოფლიოში პირველი მსგავსი პრეცედენტია. ინფორმაციას უცხოური მედია ავრცელებს. 

იტალიელ კაცს სიმპტომები ესპანეთში მოგზაურობიდან დაბრუნების შემდგომ გამოუვლინდა. საზღვარგარეთ მას დაუცველი სექსი ჰქონდა, რაც აივ-ინფექციის გადადების რისკის შემცველია.  

ყველაფერი მაღალი ტემპერატურით, დაღლილობითა და ყელის ტკივილით დაიწყო. 2 ივლისს კაცს კორონავირუსი დაუდასტურდა, მომდევნო დღეს კი სახესა და ტანზე გამოაყარა.

5 ივლისს მან საავადმყოფოს მიაკითხა, სადაც ექიმებმა მაიმუნის ყვავილის დიაგნოზი დაუსვეს. ამის შემდეგ სპეციალისტებმა ის სქესობრივი გზით გადამდებ ინფექციებზეც შეამოწმეს და მის ორგანიზმში შიდსის გამომწვევი ვირუსის არსებობაც გამოავლინეს.