„რეალმა“ და „ბარსელონამ“ შეიძლება ევროლიგა დატოვონ - ევროპული კალათბურთი დიდი ცვლილებებისთვის ემზადება

ევროპულ კალათბურთში სერიოზული ცვლილებები იგეგმება. ეროვნული საკალათბურთო ასოციაცია (NBA) ევროპაში საკუთარი ლიგის დაარსებას აპირებს, რომელშიც 10-12 კლუბი ითამაშებს. ამის შესახებ დაწერა NBA-ის ცნობილმა მიმომხილველმა ბილ სიმონსმა.

„მაშ ასე, NBA შეეცდება „რეალისა“ და „ბარსელონას“ გადაბირებას, რადგან მათ მომავალ წელს შეიძლება ევროლიგა დატოვონ. ვფიქრობ, ადამ სილვერი მოიაზრებს გუნდებს ლონდონიდან, მანჩესტერიდან, პარიზიდან, მადრიდიდან, ბარსელონადან, მილანიდან, ბერლინიდან, სტამბულიდან, აგრეთვე რომელიმე გუნდს საბერძნეთიდან.

შეიძლება ამათ დაემატოს ტონი პარკერის გუნდი საფრანგეთიდან. ეს არის „ვილერბანი“. ტონი მისი პრეზიდენტია. შესაძლოა, მომავალში გაჩნდეს გუნდი ისრაელიდან, ან მესამე ესპანური გუნდი“, – მოჰყავს სიმონსის სიტყვები გამოცემა Basket News-ს.

იტყობინებიან, რომ ახალი ტურნირის მონაწილეები მიიღებენ გარანტირებულ ადგილს გავარდნის რისკის გარეშე, ასევე წვდომა ექნებათ სატელევიზიო და სასპონსორო შემოსავლებზე.

პროექტის რანგში განიხილება საგამოფენო მატჩები, რომელიც შეიძლება გაიმართოს მანჩესტერში, ლონდონში ან პარიზში. ერთ-ერთი მნიშვნელოვანი იდეაა – მატჩების ორგანიზება ამერიკული და ევროპული NBA-ის გამარჯვებულებს შორის. ეს შეიძლება იყოს სერია ორ მოგებამდე, ან მინი-ტურნირი ორივე ლიგის საუკეთესო გუნდებს შორის.

„რას სთავაზობს NBA? მე გავიგე, რომ ლიგაში 10 გუნდი იქნება, მაგრამ ეს რიცხვი შეიძლება შეიცვალოს – იყოს 8 ან 12. გუნდები გარანტირებულ ადგილს მიიღებენ ლიგაში. ექნებათ ხმის უფლება, საუკეთესო სატელევიზიო განაწილება, საუკეთესო სპონსორობა.

იქნება საჩვენებელი მატჩები NBA-ის გუნდებთან. ამასთან დაკავშირებით რამდენიმე იდეა მოვისმინე. შესაძლოა, უკვე ოქტომბერში ჩატარდება მატჩები NBA-ისა და ევროპული ლიგის სამ-სამ საუკეთესო გუნდს შორის. ისინი მოაწყობენ მცირე წრიულ ტურნირებს. შესაძლოა, ეს იყოს უბრალოდ მატჩები – „ჩემპიონი ჩემპიონის“ წინააღმდეგ.

შესაძლოა, კიდევ რაღაც მოაწყონ თებერვალში, ვარსკვლავური უქმეების დროს და აქ საუკეთესო გუნდები ითამაშებენ. 20 წლის შემდეგ, ალბათ, უფრო მეტი გადაკვეთა იქნება ლიგებს შორის“, – დაწერა სოციალურ ქსელში სიმონსმა.