ოსკარების დაჯილდოებას საუკეთესო კასკადიორების ნომინაცია ემატება

ოსკარების დაჯილდოების ცერემონიას მალე კასკადიორებისთვის განკუთვნილი სპეციალური ნომინაცია დაემატება.

ამერიკის კინოაკადემიის მმართველმა საბჭომ დღეს დააანონსა ახალი, ყოველწლიური კონკურსის კატეგორიის შექმნა — აკადემიის ჯილდო საუკეთესო ტრიუკის დიზაინისთვის, რომელიც პირველად 2028 წელს ოსკარების მე-100 დაჯილდოებაზე გაიცემა 2027 წელს გამოსული ფილმებისთვის.

ინიციატივას კასკადიორთა საზოგადოების სახელით რეჟისორი და პროდიუსერი დევიდ ლიტჩი (The Fall Guy-ს, Bullet Train-ისა და Deadpool 2-ის ავტორი) ხელმძღვანელობდა. ლიტჩი კარიერაში პირველად კასკადიორად და კოორდინატორად მოღვაწეობდა, სანამ რეჟისორობას დაიწყებდა და კელი მაკკორმიკთან ერთად დააარსებდა პროდიუსინგის საკუთარ კომპანიას — 87North Productions-ს. ლიტჩმა, კასკადიორთა კოორდინატორმა და დიზაინერმა კრის ო’ჰარამ და მათმა კოლეგებმა არაერთი პრეზენტაცია წარუდგინეს კინოაკადემიას, რაც საბოლოოდ ახალ კატეგორიაზე მმართველი საბჭოს თანხმობით დასრულდა.

ლიტჩმა განცხადებაში აღნიშნა: „კასკადიორული ხელოვნება ყველა ჟანრის ფილმისთვის აუცილებელია და ის ღრმად არის ფესვგადგმული ჩვენი ინდუსტრიის ისტორიაში — დაწყებული პიონერი ხელოვანებისგან, როგორებიც იყვნენ ბასტერ კიტონი, ჰაროლდ ლოიდი და ჩარლი ჩაპლინი, დამთავრებული თანამედროვე კასკადიორული დიზაინერების, კოორდინატორების, შემსრულებლებისა და ქორეოგრაფების შთამაგონებელი ხელოვნებით.“

„ეს გრძელი გზა იყო მრავალი ჩვენგანისთვის. მე და კრის ო’ჰარამ წლები დავხარჯეთ იმისთვის, რომ ეს მომენტი რეალობად გვექცია — იმ კასკადიორთა პროფესიონალების მემკვიდრეობაზე დაყრდნობით, რომლებიც ათწლეულების განმავლობაში დაუღალავად იბრძოდნენ აღიარებისთვის. ჩვენ უსაზღვროდ მადლიერები ვართ. მადლობა აკადემიას," — წერს ლიტჩი.