ტრამპის მკვლელობის მცდელობის დროს წარუმატებელი მოქმედების გამო, საიდუმლო სამსახურის ექვს აგენტს უფლებამოსილება შეუჩერეს

დონალდ ტრამპის მკვლელობის მცდელობის დროს წარუმატებელი მოქმედების გამო, საიდუმლო სამსახურის ექვს აგენტს უფლებამოსილება შეუჩერეს.

ინციდენტი გასულ წელს პენსილვანიის შტატის ქალაქ ბატლერში მოხდა.

სროლის შედეგად აშშ-ის პრეზიდენტობის მაშინდელი კანდიდატი, დონალდ ტრამპი მსუბუქად დაშავდა. ტრამპს ტყვია ყურში მოხვდა და გაკაწრა.

ადგილზე მყოფმა ტრამპის საიდუმლო სამსახურის კონტრსნაიპერებმა მოკლეს მსროლელი, რომელიც, გამოძიების ფედერალური ბიუროს ცნობით, 20 წლის თომას მეთიუ კრუკსი იყო.
სროლის შემდეგ, შიდა უსაფრთხოების დეპარტამენტის მიერ ჩატარებულმა დამოუკიდებელმა მიმოხილვამ აჩვენა, რომ სამართალდამცავი ორგანოების რიგმა ჩავარდნებმა შექმნა გარემო, რამაც ტრამპი პოტენციური მკვლელის წინაშე დაუცველი გახადა.

„საიდუმლო სამსახური არ ასრულებს იმ ელიტურ დონეს, რაც საჭიროა მისი კრიტიკული მისიის შესასრულებლად. საიდუმლო სამსახური ბიუროკრატიული, თვითკმაყოფილი და სტატიკური გახდა, მიუხედავად იმისა, რომ რისკები გამრავლდა და ტექნოლოგიები განვითარდა“, – აღნიშნულია მოხსენებაში.

ექვსი აგენტის მიმართ დისციპლინური ზომები ბოლო თვეებში იქნა გამოტანილი და აგენტებს გასაჩივრების უფლება მიეცათ.