თეთრი სახლი „დემოკრატიის ფონდის“ პროგრამებზე: „დემოკრატიის ხელშეწყობის აქტივობები“ ძირს უთხრის ამერიკულ ღირებულებებს და ერევა სხვა ქვეყნების სუვერენიტეტში - უქმდება პროგრამები, რომლებითაც ერეოდნენ უცხო ქვეყნების არჩევნებში

აშშ-ის პრეზიდენტმა, დონალდ ტრამპმა 322 მილიონ დოლარზე მეტი ღირებულების დახმარების პროგრამები შეწყვიტა, რომლებიც „დემოკრატიის ფონდის“ მეშვეობით ხორციელდებოდა. ინფორმაციას ამის შესახებ თეთრი სახლი ავრცელებს.

„ე.წ. დემოკრატიის ხელშეწყობის აქტივობები ძირს უთხრის ამერიკულ ღირებულებებს, ასუსტებს ამერიკის აღქმას საზღვარგარეთ და ერევა სხვა ქვეყნების - მათ შორის ჩვენი მოკავშირეების - სუვერენიტეტში. მაგალითად, [ამ პროგრამის ფარგლებში] დაფინანსდა ისეთი პროგრამები, როგორებიცაა „გენდერულად მგრძნობიარე მმართველობა“ და „ინფორმაციული მთლიანობის, თანასწორობისა და დემოკრატიის გაძლიერება LGBTQI+ მოსახლეობისთვის“, - ნათქვამია თეთრი სახლის განცხადებაში.

„ეს ქმედება გააუქმებს იმ პროგრამებს, რომლებიც ახორციელებდნენ ცენზურის ოპერაციებს და ერეოდნენ უცხო ქვეყნების არჩევნებში. ეს წინადადება შეესაბამება ადმინისტრაციის ძალისხმევას, დაუბრუნოს ამერიკელ გადასახადის გადამხდელებს ფინანსები, რომლებიც უცხო ქვეყნებისთვის გაცემულ უსარგებლო დახმარების პროგრამებზე იხარჯება“, - აღნიშნეს ტრამპის ადმინისტრაციაში.