გერმანიაში, ერთ-ერთი ქალაქის ახალარჩეულ მერს თავს დაესნენ. ის კრიტიკულ მდგომარეობაშია

დასავლეთ გერმანიაში, ჩრდილოეთ რაინ-ვესტფალიაში მდებარე ქალაქ ჰერდეკეს მერი, ირის შტალცერი დანით დაჭრეს.

ადგილობრივი მედიის ცნობით, 57 წლის ქალს საკუთარი სახლის წინ დაესხნენ თავს. WDR-ის მონაცემებით, ის შვილმა იპოვა. შტალცერმა მას უთხრა, რომ ქუჩაში რამდენიმე კაცი დაესხა თავს. OVB-ის ცნობით, შტალცერი კრიტიკულ მდგომარეობაშია. Bild-ი წერს, რომ მას მრავალი ჭრილობა აქვს მიყენებული მუცლისა და ზურგის არეში.

თავდამსხმელის (ან თავდამსხმელების) და მათი მოტივების შესახებ ამ ეტაპზე არაფერია ცნობილი. პოლიციამ გაზეთ Zeit-ს დაუდასტურა, რომ დანაშაულის ჩამდენი პირების დასაკავებლად სამძებრო ოპერაციას ატარებს, თუმცა სხვა დეტალები არ გაუმხელია.

ირის შტალცერი გერმანიის სოციალ-დემოკრატიული პარტიის (Sozialdemokratische Partei Deutschlands, SPD) წარმომადგენელია. ის ჰერდეკეს მერად 28 სექტემბერს აირჩიეს, როდესაც მეორე ტურში ხმების 52.8% მიიღო.