ამიერიდან რამზან კადიროვი „ერის მამაა“ - ჩეჩნეთის პარლამენტმა ცვლილებები ერთხმად დაამტკიცა

ჩეჩნეთის პარლამენტმა რესპუბლიკის კონსტიტუციაში ცვლილებები ერთხმად დაამტკიცა. განხორციელებული ცვლილებებით, ჩეჩნურ ენაზე რეგიონის ხელმძღვანელის თანამდებობას  „მეხკ-და“ დაერქვა. სიტყვასიტყვით „მეჰკან-და“ მიწის მამას ნიშნავს, მაგრამ გამოიყენება „ხალხის მამას“ მნიშვნელობით.

ასევე, ძირითად კანონში შევიდა დებულებები, რომლის მიხედვითაც რესპუბლიკის მეთაური არის კონსტიტუციის დაცვის, ადამიანისა და მოქალაქის უფლებებისა და თავისუფლებების გარანტი და უფლებამოსილია უზრუნველყოს კანონის უზენაესობა, უსაფრთხოება და ჩეჩნეთის ტერიტორიული მთლიანობა, მასში სამოქალაქო მშვიდობისა და ჰარმონიის შენარჩუნება.

კონსტიტუციური კანონის განხილვასა და მიღებას თვეზე ნაკლები დასჭირდა - ის ჩეჩნეთის პარლამენტის ხელმძღვანელმა მაგომედ დაუდოვმა და 20-მა სხვა დეპუტატმა წარადგინეს.