„მეგობართან მიდიოდა, საწოლიდან არ დგება და უნდა ვეჩხუბოო“ - ემოციური ისტორია 82 წლის ავრორაზე

ჟურნალისტი ნანა აკობიძე სოციალურ ქსელში უსაყვარლესი, 82 წლის ავრორას შესახებ წერს, რომელიც მეგობრის მოსანახულებლად მიდიოდა.

„კოპლებიანი გოგო გავიცანი ქუჩაში - დაქალთან მიდიოდა: საწოლიდან არ დგება და უნდა ვეჩხუბოო.

ცხელი შოთი მიჰქონდა და მოსაკითხი მწვანე ჩანთით.

„არადა, ჩემხელაა, რა დროს მაგის ჩაწოლაა. არაფერი არ აწუხებს, უბრალოდ, ჩაწვა და აღარ დგებაო".

ვიარეთ ასე ლაპარაკ-ლაპარაკით მისი დაქალის სადარბაზომდე.

რა ქნა ნეტა: ეჩხუბა? ააყენა??

მომინდა, მე ვყოფილიყავი ის ჩაწოლილი დაქალი და ასე, ცხელი შოთით და ნაჭრის ჩანთაში ჩაწყობილი მოსაკითხით დამდგომდა თავზე ჩემი კოპლიანი ლამაზი მეგობარი.

მისი ხათრით ავდგებოდი. ულამაზესი გოგო, სახელად ავრორა. 82-ის.

ექიმობა მინდოდა, მარა კიდე კარგი, არ გამოვედიო. რამდენ ავადმყოფს ვერ მოვარჩენდი და ვივლიდი სულ ნერვებმოშლილიო“,- წერს ნანა აკობაძე.