დატბორილია კარვები, ქუჩები, მაღაზიები და საავადმყოფოები - ღაზაში ძლიერი შტორმის შედეგებს ებრძვიან

ღაზას სექტორში იძულებით გადაადგილებული პალესტინელები ძლიერ შტორმისგან გამოწვეული წყალდიდობის საფრთხის წინაშე არიან, რადგან ზამთრის შტორმი განადგურებული ტერიტორიის ნაწილს ტბორავს. ინფორმაციას abcnews-ი ავრცელებს.

ღაზას სექტორში გადაღებული ფოტოები და ვიდეოები აჩვენებს, რომ დატბორილია კარვები, ქუჩები, მაღაზიები და საავადმყოფოებიც კი.

ჰამასის მიერ კონტროლირებადი პალესტინის სამოქალაქო თავდაცვის სააგენტო იტყობინება, რომ გასულ კვირას, შტორმის დაწყებიდან სულ მცირე 15 ნაწილობრივ დაზიანებული სახლი ჩამოინგრა, რასაც 12 ადამიანის სიცოცხლე ემსხვერპლა.

გაეროს ცნობით, ღაზაში საცხოვრებელი შენობების დაახლოებით 92%-ი მთლიანად ან ნაწილობრივ განადგურებულია, რაც შეშფოთებას იწვევს ახალი შენობების შესაძლო ჩამონგრევის შესახებ, რადგან ძლიერი წვიმები და ქარი გრძელდება.