არასაკმარისი ძილი, შესაძლოა, წონის მატების ერთ-ერთი მნიშვნელოვანი მიზეზიც გახდეს - ახალი კვლევა

ძილის ქრონიკული ნაკლებობა მხოლოდ დაღლილობასა და კონცენტრაციის გაუარესებას არ იწვევს. ახალი სამეცნიერო კვლევა აჩვენებს, რომ რეგულარულად არასაკმარისი ძილი შესაძლოა წონის მატების ერთ-ერთი მნიშვნელოვანი მიზეზიც გახდეს.

კვლევა, რომელიც ავტორიტეტულ სამედიცინო ჟურნალ Annals of Internal Medicine-ში გამოქვეყნდა, ამერიკელმა მეცნიერებმა ჩაატარეს. მათ შეისწავლეს, როგორ მოქმედებს ძილის ხანგრძლივობის შემცირება სხეულის წონასა და მეტაბოლურ პროცესებზე.

კვლევაში მონაწილეობდა 95 ზრდასრული ადამიანი, რომლებიც გულ-სისხლძარღვთა და მეტაბოლური დაავადებების განვითარების გაზრდილი რისკის ჯგუფს მიეკუთვნებოდნენ. ექსპერიმენტის პირველ ეტაპზე მონაწილეები ექვსი კვირის განმავლობაში ჩვეულ რეჟიმში, საშუალოდ შვიდ საათზე მეტხანს იძინებდნენ. შემდეგი ექვსი კვირის განმავლობაში კი მათი ძილის ხანგრძლივობა ყოველ ღამით მხოლოდ 90 წუთით შემცირდა.

მეცნიერებმა დაადგინეს, რომ ერთი შეხედვით უმნიშვნელო ცვლილებაც კი საკმარისი აღმოჩნდა იმისთვის, რომ მონაწილეებს სხეულის წონა და წელის გარშემოწერილობა ოდნავ, თუმცა სტატისტიკურად მნიშვნელოვნად გაზრდოდათ.

სპეციალისტები განმარტავენ, რომ ძილის ნაკლებობის დროს ადამიანი არა მხოლოდ ნაკლებად აქტიურია დღის განმავლობაში და ნაკლებ კალორიას წვავს, არამედ ორგანიზმში ჰორმონული ცვლილებებიც ვითარდება. იზრდება შიმშილის ჰორმონის – გრელინის – დონე, ხოლო მცირდება დანაყრების ჰორმონის – ლეპტინის – გამომუშავება. შედეგად, იზრდება მადა და განსაკუთრებით ძლიერდება სურვილი ტკბილი, ცხიმიანი და მაღალკალორიული საკვების მიმართ.

კვლევის ავტორების შეფასებით, თუ ძილის დეფიციტი ხანგრძლივი დროის განმავლობაში გრძელდება, ეს შესაძლოა სიმსუქნის განვითარების რისკსაც ზრდიდეს, განსაკუთრებით იმ ადამიანებში, რომლებსაც უკვე აქვთ მეტაბოლური დარღვევები ან გულ-სისხლძარღვთა დაავადებების რისკფაქტორები.