ჯეი დი ვენსი: ტრამპის ისრაელელმა კრიტიკოსებმა უნდა გაიღვიძონ და შეხედონ რეალობას - ის ერთადერთი ლიდერია მთელ მსოფლიოში, რომელიც ამ მომენტისთვის ისრაელის სახელმწიფოს მიმართ სიმპათიით არის განწყობილი

აშშ-ის ვიცე-პრეზიდენტმა, ჯეი დი ვენსმა განაცხადა, რომ დონალდ ტრამპი მსოფლიოში ერთადერთი ლიდერია, რომელსაც ისრაელის მიმართ სიმპათია აქვს და რომ აშშ არის ერთადერთი „ძლიერი მოკავშირე“, რომელიც ისრაელს დარჩა.

მან დასძინა, რომ ისრაელის იარაღის დიდი ნაწილი აშშ-შია წარმოებული და აღნიშნა, რომ ისრაელელებმა, რომლებიც ტრამპის კრიტიკაზე არიან ფოკუსირებულნი, „უნდა გაიღვიძონ და შეხედონ იმ რეალობას, რომელშიც მათი ქვეყანა იმყოფება“.

მან აღნიშნა, რომ პრემიერ-მინისტრი ბენიამინ ნეთანიაჰუ მასთან საუბრებში შეთანხმების კრიტიკისგან თავს იკავებს.

„რასაც ვიტყვი და ეს ნამდვილად მაწუხებს, არის ის, რომ თქვენ იხილეთ ადამიანები ბიბის მთავრობიდან, რომლებიც გამოვიდნენ და გააკრიტიკეს ეს გარიგება, ზოგჯერ კი ძალიან პირადულად დაესხნენ თავს ამერიკის შეერთებული შტატების პრეზიდენტს. დონალდ ტრამპი ერთადერთი ლიდერია მთელ მსოფლიოში, რომელიც ამ მომენტისთვის ისრაელის სახელმწიფოს მიმართ სიმპათიით არის განწყობილი. და ის მსოფლიოს ზესახელმწიფოს მეთაურია. ისრაელის მთავრობის კაბინეტის წევრი რომ ვიყო, თავს შევიკავებდი იმ ერთადერთი ძლიერი მოკავშირის კრიტიკისგან, რომელიც მსოფლიო ასპარეზზე დამრჩა“, - აღნიშნა მან.

ისრაელელი კრიტიკოსებისადმი მიმართვისას მან დაასკვნა: „ბოლო სამი თვის განმავლობაში, თქვენი ქვეყნის თავდაცვისთვის საჭირო იარაღის ორი მესამედი ამერიკაშია დამზადებული და ამერიკელი გადასახადის გადამხდელების მიერაა დაფინანსებული“.