fbpx
01:27 | 2021-01-14 ავტორი: Prime Time

სამღვდელოება ღამის 11 საათზე ჩავიდა ქრისტიანი მოსახლეობის დასამშვიდებლად – მიტროპოლიტი იოსები ბუკნარის ინციდენტზე

სამღვდელოება ღამის 11 საათზე ჩავიდა ქრისტიანი მოსახლეობის დასამშვიდებლად – მიტროპოლიტი იოსები ბუკნარის ინციდენტზე

„ჩვენთვის მნიშვნელოვანია, მშვიდობა ძმებს შორის“ – შემოქმედის მიტროპოლიტი იოსები რელიგიური დაპირისპირების ფაქტს ეხმაურება.

 

ჩოხატაურის მუნიციპალიტეტში, სოფელ ბუკნარში რელიგიურ ნიადაგზე დაწყებულ კონფლიქტს შემოქმედის მიტროპოლიტი იოსები საგანგებო განცხადებით ეხმაურება, რომელსაც უცვლელად გთავაზობთ:

 

„სამწუხაროდ, სოფელ ბუკნარში რელიგიურ ნიადაგზე მოხდა დაპირისპირება მუსლიმან თემსა და ქრისტიან მოსახლეობას შორის, რის შესახებაც ჩვენ, სამღვდელოებამ, გავიგეთ 12 იანვარს, 21:00 საათზე. რა თქმა უნდა, ეს ჩვენთვის შემაშფოთებელი იყო.

 

ასევე, ჩვენთვის ცნობილი გახდა, რომ აჭარიდან – ზოტიდან და სხვა სოფლებიდან- 13 იანვარს აპირებდნენ ჩამოსვლას სოფელ ბუკნარში სპეციალურად შემზადებული ადამიანები, ამიტომ პირადად მე მყისიერად მივიღე გადაწყვეტილება, სამღვდელოება გამეშვა სოფელ ბუკნარში ვითარების განსამუხტად. რადგანაც უკვე კომენდანტის საათი იყო, ბატონ ზურაბ ნასარაიას, გურიის სახელმწიფო რწმუნებულს, დავურეკე და ვთხოვე, სასულიერო პირებისთვის გადაადგილების საშუალება მოეცა. თანხმობის მიღების შემდეგ სამღვდელოება ღამის 11 საათზე ჩავიდა ქრისტიანი მოსახლეობის დასამშვიდებლად, რათა მონაწილეობა არ მიეღოთ მოსალოდნელ დაპირისპირებაში. საუბარმა, რა თქმა უნდა, შედეგი გამოიღო: მეორე დღეს მოხდა შერიგება გურულებსა და აჭარლებს შორის.

 

ჩვენთვის ძალიან მნიშვნელოვანია მშვიდობა ძმებს შორის და მივესალმებით იმ შერიგების პროცესს, რაციქნა მიღწეული ჩვენი თუ სხვა კეთილი ადამიანების რუდუნებით.

 

ღმერთმა დალოცოს და გაახაროს ყველა ქართველი, მათ შორის გურულები და აჭარლები. გურია და აჭარა საუკუნეების განმავლობაში ერთი კუთხე იყო საქართველოსთვის და ერთი კუთხე იქნება ღვთის მადლით მომავალშიც“, – აცხადებს მიტროპოლიტი იოსები.

ავტორი: Prime Time
X