პოლიციის აკადემია უმაღლესი საგანმანათლებლო დაწესებულება გახდება - კურსანტები, სამწლიანი საბაკალავრო პროგრამის ფარგლებში, ფიზიკურ, ტაქტიკურ და საცეცხლე მომზადებას გაივლიან

პოლიციის აკადემია მალე უმაღლესი საგანმანათლებლო დაწესებულების სტატუსს მიიღებს. კურსანტები, სამწლიანი საბაკალავრო პროგრამის ფარგლებში, ფიზიკურ, ტაქტიკურ და საცეცხლე მომზადებას გაივლიან. მომზადების შემდეგ კი სისტემას სრულყოფილი ცოდნითა და პრაქტიკული უნარებით აღჭურვილი გამომძიებლები, პატრულ-ინსპექტორები, მართლწესრიგის ოფიცრები, დეტექტივები, მესაზღვრე-კონტროლიორები და ექსპერტ-კრიმინალისტები დაემატებიან.

ეს არის კიდევ ერთი ინიციატივა, რომელიც შინაგან საქმეთა სამინისტროს ეკუთვნის. საკანონმდებლო ცვლილებათა პაკეტი პარლამენტში უკვე წარდგენილია. დეპუტატების განცხადებით, რეფორმა უწყების საქმიანობის ხარისხს კიდევ უფრო გააუმჯობესებს.

შინაგან საქმეთა სამინისტროში ამბობენ, რომ ცვლილება მნიშვნელოვანია - მთავარი მიზანი კადრების კვალიფიკაციის დონის ამაღლებაა, რასაც დადებითი შედეგი ექნება ყველა მიმართულებით. კურსანტები, სწავლის დასრულების შემდეგ მუშაობას სამინისტროს სხვადასხვა სტრუქტურაში განაგრძობენ.

პოლიციის აკადემიის სამწლიანი საბაკალავრო პროგრამა პირველად შეიქმნება. სწავლას სახელმწიფო დააფინანსებს. მსურველებმა უნდა დააკმაყოფილონ პოლიციაში სამუშაოდ მიღებისთვის დადგენილი მოთხოვნები, გაიარონ შემოწმება ან ჩააბარონ ერთიანი ეროვნული გამოცდები. ჩარიცხვისთანავე, სტუდენტს მიენიჭება რიგითის წოდება, კურსდამთავრებულს კი - ლეიტენანტის. კურსანტებს შესაძლებლობა ექნებათ, ისარგებლონ საერთო საცხოვრებლით, სოციალური და სამართლებრივი გარანტიებით.

ცვლილებების განხილვა კომიტეტებში სავარაუდოდ მომდევნო კვირიდან დაიწყება.