„ვისაც ასეთების ხელისუფლებაში ყოფნა გენატრებათ, ვეღარ ნახავთ” - თეა წულუკიანი „ნაციონალური მოძრაობის” მხარდამჭერის წინააღმდეგ, სამართლებრივ პროცედურებს იწყებს

საქართველოს სპორტისა და კულტურის მინისტრი თეა წულუკიანი „ნაციონალური მოძრაობის” მხარდამჭერის ქეთა გაბიანის წინააღმდეგ სამართლებრივ პროცედურებს იწყებს.

როგორც მინისტრი სოციალურ ქსელში წერს, „ეს მუქარა სამსახურებრივ საქმიანობას უკავშირდება“.

„ამ ქალბატონს არ ვიცნობ, არც ის ვიცი, ვინ არის. თავის გვერდზე რაც დაუწერია მიმდინარე წლის 12 თებერვალს საკუთარი დანაშაულებრივი განზრახვის შესახებ, აქ არის. ეს ყველაფერი აღქმულია ჩემ მიერ ზუსტად ისე, როგორც წერია - რეალურად და ადეკვატურად.

რაკი არ ვიცნობ, ფაქტია, რომ ეს მუქარა სამსახურებრივ საქმიანობას უკავშირდება.

ვისაც ასეთების ხელისუფლებაში ყოფნა გენატრებათ, ვეღარ ნახავთ, გალიაში ზის. ვისაც “ფსევდოინტელექტუალური პოზა” გიჭირავთ, რომელიც საჯარო მოხმარებისთვის უპოზიციობას გულისხმობს, ხოლო ფარულად უმსგავსობა გენატრებათ დასავლურობისა და ლიბერალიზმის სახელით, მათაც გისამძიმრებთ.
დანარჩენი სამართლებრივი პროცედურების საკითხია ” - წერს თეა წულუკიანი.