რეჯეფ თაიფ ერდოღანის განცხადებით, ავიაკატასტროფის გამო თურქეთი საქართველოსა და აზერბაიჯანის ხელისუფლებებთან კოორდინაციაშია

თურქეთის პრეზიდენტის რეჯეფ თაიფ ერდოღანის განცხადებით, ოფიციალური ანკარა თბილისსა და ბაქოსთან კოორდინირებულად მუშაობს, რათა საქართველოში თურქეთის სამხედრო-საჰაერო ძალების კუთვნილი სატვირთო თვითმფრინავის კატასტროფის შედეგები აღმოფხვრას.

„დიდი გულისტკივილით გავიგეთ, რომ ჩვენმა სამხედრო თვითმფრინავმა C130-მა, რომელიც აზერბაიჯანიდან თურქეთში მიფრინავდა, დღეს საქართველო-აზერბაიჯანის საზღვართან კატასტროფა განიცადა. ჩვენ ვაგრძელებთ ჩამოვარდნილი თვითმფრინავის ნაწილების სამძებრო სამუშაოებს ეროვნულ ხელისუფლებებთან კოორდინაციით“, - აღნიშნა ერდოღანმა.

საქართველო-აზერბაიჯანის საზღვართან სამხედრო თვითმფრინავის ჩამოვარდნის შესახებ ინფორმაცია ცოტა ხნის წინ გავრცელდა. ტელეკომპანია „იმედმა“ კატასტროფის ამსახველი ვიდეოკადრები მოიპოვა.

მომხდარზე ოფიციალური ინფორმაცია უკვე გაავრცელა საქართველოს შინაგან საქმეთა სამინისტრომ.