ჩემი ქმარი და დედა, ჩემი დის ოჯახი ბომბებს კიევში, სარდაფებში ემალება, შეაჩერე ომი! - ვერა ბრეჟნევა

მომღერალი ვერა ბრეჟნევა რუსეთ-უკრაინის ომს ეხმაურება. მისი თქმით, მისი მეუღლე, დედა და უმცროსი დის ოჯახი ბომბებს კიევში, სარდაფებში ემალებიან.

„არასდროს დამიყვია ჩვენი ერები. არც მაშინ, როდესაც ათასობით ადამიანსა და ბავშვს ვეხმარებოდი. ჩემი დედა და ბებია რუსები არიან. მამა და ბაბუა უკრაინელები. ორივე ხალხი ჩემი წინაპრები და ჩემი სისხლია. დავიბადე და ვცხოვრობ უკრაინაში. ახლა კი ყველა გაჭირვებულ მდგომარეობაში ვართ. 32% რუსი გამომწერი მყავს ინსტაგრამზე. მინდა, იცოდეთ სიმართლე და თუ რაიმეს გაკეთება შეგიძლიათ, გააკეთეთ. ბოლო მომენტამდე არ გვჯეროდა, რომ ეს მოხდებოდა. მაგრამ მეხუთე დღეა ომში ვართ. სულ უფრო მეტი მშვიდობიანი მოქალაქე იღუპება. სულ უფრო მეტი სახლი, სკოლა, საბავშვო ბაღი ნადგურდება. მე ახლა უსაფრთხოდ ვარ ბავშვებთან ერთად, მაგრამ ჩემი ქმარი და დედა, ჩემი უმცროსი დის ოჯახი ბომბებს კიევში, სარდაფებში ემალებიან, რადგან საომარი მოქმედებები მიმდინარეობს კიევში და სხვა ქალაქებში. თითოეული უკრაინელი ეხვეწება რუს ჯარისკაცებს - არ მოხვიდეთ, არ მოგვკლათო. ამ ომს აზრი არ აქვს. მას არ აქვს საბაბი. ვერ გააგრძელებ… შეაჩერე ომი!“ - წერს ბრეჟნევა.